Shillong, Lber 14 : U Myntri Rangbah ka Jylla Conrad K Sangma ha ka sngi Palei ula ong ba ka Sorkar jong u, kala phah ia ka khubor kaba shai ba kan ym khein sting satia haba phai sha ki kam kaikhlaw bad kiwei kiwei ki kam dawa pisa.
U Myntri Rangbah ula kynthoh ia kane haba jubab ba kumno ka Sorkar kan pynthikna ba ki kam dawa pisa jong ki kynhun kaikhlaw bad kiwei kiwei ki kam beain, kin ym pynliem ia ka jingthmu ban pynsuk sengkam sengjam jong ki kompani shimet lyngba ka Meghalaya Industrial and Investment Promotion Policy (MIIPP), 2024.
“…Phi lah iohi hi ba ngi khlem shim sting ia ki kam dawa pisa, ngi lah iakhun tyngeh bad ka khubor jong ngi sha baroh ka long ba ngin ym khein sting bad aili satia” ong u Conrad haba iakren bad ki nongthoh khubor.
“Ngin sa shim ia barim ki sienjam ban pynthikna ba ym dei ban don mano mano ruh ki ban pynduh ia ka jingsngew shaniah bad ngi la shim ia ki lad ki lynti kiba pyrkhing ban pynthikna ba ka shongsuk shongsain kan neh. Ki lah ban don ki jingsngewkhia hangne hangtai, ki lah ban don ki jingeh bad ki lah ruh ban don ki jingjia hangne hangtai hynrei kine ki dei kiba ju jia beit ha kano kano ka Jylla ne ka Ri, hynrei ngin sa khmih ia kine ki jingtynjuh ynda ngi la iatyngkhuh” ula ong.
U Myntri Rangbah ula ong ba ka jingthut ka shong suk shongsain ka dei ka jingeh jong ki snem bala leit noh bad dei namar kane ka daw ba ka jingwan kynshew kam jong ki kompani kam shym la jia hapoh ka Jylla.
“Ka daw ba ki jingkynshew kam kim wan ha Jylla namar ka jinglong jingman ha rud ha kiar. Kam don satia ka jingkyrshan, phi lah ban ong ba kam don ka jingsngew shaniah da ki nongkynshew bad kiwei kiwei” ula ong.
U Conrad ula ong, “Namar kata, nga kwah ban kren shai ba ngi la shimkhia ia baroh kine kiei kiei bad ngin pynthikna ba ki nongkynshew kam ki don ia ka jingshaniah bad sngew shngain ba kin wan bad kynshew kam hangne”.
