Shillong, Jymmang, 08: Ka samla ba wan nyngkong eh ha ka eksam HSSCL jong ka Commerce samla Filarisha Wann kala ong ba ka jingtrei shitom bad ka jingtrei shalak ki dei kiba donkam tam ban poi sha ka jingjop.
Kane ka samla pule ka St.Mary’s Higher Secondary School, Shillong kala ioh haduh 472 mark bad ioh haduh 100 na ka 100 mark ha ka sobjek Mathematic bad Accountancy.
“Nga sngew kmen palat bad sngew nguh shikatdei eh ia ki nonghikai jong nga bad ki kmie Kpa kiba la kyrshan ia ka met bad mynsiem. Nga khlem khmih lynti ban wan hakhlieh duh hynrei kane kala wan jia namar jong ki” ong ine I samla.
Kane ka samla kala ai jingmut ruh halor ka jingdonkam ban long kiba la pynkhreh bha ha ka pyrkhat pyrdain haba leit thoh ia ka eksam.
Haba kren halor ki jingktah jong ki Social Media, kane ka samla kala ong “Ka Social Media ka dei kaba pynthut eh ia ka jingpynleit jingmut ha ka pule dangle bad ki dei ki nongshun ba khraw eh jong ka pule dangle. Nga ruh nga la mad ia kane hynrei phi hap ban kynmaw ba ka pule puthi jong phi, ka dei ban wan hakhmat eh”.
Haba kren halor ki lawei ban wan, kane ka Samla kala pyntip ba kan sa leit pule ia ka B.Com bad kan pynkhreh lang ruh ha kajuh ka por ia ki competitive exam.
Ka Principal ka St Mary’s Sister Sonia Chacko kala shim ia ka kabu ban ai ka jingkhublei naduh ka mynsiem ia ki samla pule, kiba la ioh ia ka jingjop da kaba ioh top position ha ka eksam commerce.
