Shillong, Rymphang 27 : U Myntri ka tnad Pule Puthi Bah Lahkmen Rymbui ula pyntip ia ka Iingdorbar Thaw Ain ha ka sngi Thohdieng, ba ka jinghikai kaba bniah halor ka kam shongkha la ai jinghikai ha ki skul ka Jylla lyngba ki lynnong kiba iadei bad ka jinglong samla, ka jingpunkhun samla, STI, HIV/AIDS bad ka jingkha khun.
“Ka Comprehensive sex education (CSE) programme kala don ha ka dur jong ki jingai jinghikai ba iadei bad ki lynnong kum ka jinglong samla, ka heh ka san, ka jingpun khun dangsamla, ka jingngat khniang haba shongkha, ka HIV/AIDS, ka jingkha khun bad kiwei kiwei kumba la buh ban pule ha ki kot jong ka Health & Physical Education klas IX bad X bad ruh ha ka kot Science (kot NCERT bala shim da ka Board na ka byntaki klas VIII bad X)” ong u Bah Rymbui haba ai jubab hapoh ka Iingdorbar Thaw Ain ha ka sngi Friday.
“Baroh ki skul hapoh ka Meghalaya Board of School Education (MbOSE) ki ai jinghikai halor ka Sex Education kat kum ka rta ki khynnah bad ki klas, kiba don ha ki kot pule” ula bynrap.
