Shillong, Rymphang 22 : U MLA ka Congress na Umsning Dr Celestine Lyngdoh ka sngi Palei, ula kyntu ia ka Sorkar Jylla ba kan kyrpad ia ka Regional Institute of Medical Sciences, Imphal ba kan ai bhah ha ki Department kum ka radiology ban pule Specialist ia ki doktor kiba dei na Meghalaya.
Haba shim na ka jubab jong ka Myntri ka Koit ka khiah Kong Ampareen Lyngdoh ba ka Bhaitbari CHC kam don satia ia ki Imaging Facilities namar ka jingbym don ia ki doktor kiba tbit ban pyntreikam ia ka kor, u Dr Celestine ulaong ba ki Jylla bapher bapher ka thain Shatei Lam Mihngi kila pyndonkam ia ka RIMS, Imphal ban pule Specialist. Hynrei, hateng hateng kane ka Institute ka ai ia ki Department ki bym donkam da ka Meghalaya.
“Namar kata, hato ka tnad ka kot ka khiah ka lah ban kyrpad ia u Director ka RIMS, Imphal ban ai ia ki Tnad pule kaba ka Jylla ka donkam ia ki Specialist kum ka radiology khnang ba ngin lah ban phah ia ki doktor ka Jylla ban leit pule pyntbit” ula ong.
Ka Myntri ka koit ka khiah kala kular ban sa shong bishar ia kane ka jingai jingmut.
