Shillong, Iaiong 17 : U National General Secretary ka NPP bad Symbud Myntri Rangbah Bah Sniawbhalang Dhar ha ka sngi Thohdieng ula ong ba ki paidbah ka Ri-lum Jaintia kin sa ai da ka “Red Card” ia ka Voice of the People Party (VPP) ha ka elekshon MLA 2028.
“Phi tip balei ba ki (VPP) leit man ka por sha ri-lum Jaintia?, Ka dei namar ki sheptieng ia ki paid Jaintia namar ba ngi la dep ai “Yellow Card” ha ka elekshon MDC ba dang shu dep, bad ngin sa ai sa ka “Red Card” ha u 2028” ong u Bah Sniawbha.
“Kila jan ioh ia ka Yellow Card ha ri-lum Khasi ruh. Kila jop na baroh 29 seat ha ka elekshon MP hynrei kila jop pat tang 17 seat ha ka elekshon KHADC. Ka long kumba la ioh yellow card. Namar kane, kila duhthiah duh dem bad ki bunkam ha ki jingkren bym don nongrim” ula bynrap.
Kane ka jingkynthoh kala mih tang shisien hadien ba u President ka VPP Ardent M Basaiawmoit ula byrngem ban leit rah iakren sha ka Election Commission of India (ECI) ba kan peitngor bha ia ka ri-lum Jaintia hashuwa ka elekshon MLA 2028 haba ai jingkren ha ki jingialang paidbah ba long ha Jowai, West Jaintia Hills District.
Ka VPP ha ka shithi ba la phah dang shen sha u Chief Secretary, kala dawa ia ka jingtohkit ba laitluid halor ka jingbym lah jong ka Sorkar ban pynlong ia ka elekshon kaba iaid beit iaid ryntih sha ka Iingdorbar ka JHADC.
Ka VPP kala jop tang 8 seat ha ka elekshon JHADC katba 17 seat ha KHADC ha ka elekshon kaba long ha u bnai Rymphang mynta u snem.
U Bah Sniawbha ula kyntu ia ka VPP ba kan burom ia ka rai ba la ai da ki paidbah ka ri-lum Jaintia bad ban sngewbha ban hikai skul ia ka ECI ba kumno kan pyniaid ia ka elekshon.
“Da ka jingjop (elekshon JHADC), kam mut ba ka NPP kala pyndonkam bakla ia ka bor bad kam mut ruh ba ka VPP ka jop ia ka elekshon KHADC namar kila pyndonkam bakla ia ka bor. Kaei kaba kongsan ka long ba ngi dei ban burom ia ka rai jong u paidbah. Ban ong ba ngin leit sha ka ECI, nga sngew phi (VPP) donkam ban hikai ia ka ECI ba kaei kaba ka dei ban leh bad kaei ka bym dei ban leh” ula ong.
Une u Nongialam ka NPP ula niew ruh ia kane ka kam jong ka VPP kum ka sienjam ba sheptieng bad jingbym sngew shngain.
 ha ka elekshon MLA 2028.){kind=link}