Shillong, Jymmang 13: U Director ka NEIGRIHMS Prof. (Dr.) Nalin Mehta ula ban jur iaka jingdonkam ban ai jingithuh iaki Nurse kiba trei borbah ban shakri iaki paidbah ha ka koit ka khiah.
Ia kane u Director ula kren haka jingrakhe ka Hospital NEIGRIHMS iaka sngi Kyrpang jong ki Nurse lane ka International Nurses Day.
“Ka la dei ka por ban ithuh ïa ki Nurse na ka bynta ka jingaiti, ka jingtrei shitom jong ki, bad ka bynta kaba kongsan kaba ki la leh ha kaba kyntiew ïa ka koit ka khiah bad ban iada iaka jingim jong ki paidbah” la ong u Prof Mehta haba kren ha kane ka jingïalang ba la pynlong da ka NEIGRIHMS Nurses Association ha ka 12 tarik Jymmang.
U la ai khublei ia ki nurse jong ka NEIGRIHMS na ka bynta ka jingtbit, ka jingaiti, bad ka jingshakri khlem sangeh jong ki ia ki nongpang bad u la pynpaw, kumno ki trei wat shabar jong ka koit ka khiah.
U Prof Mehta u la ai khublei ïa ki nurse jong ka NEIGRIHMS na ka bynta ka jingtrei shitom jong ki ym tang ha kaba pynbiang ïa ka jingsumar hynrei wat sha ki kam ai jinghikai ba la pynlong man ka por na ka bynta ki Nurse jong ka thaiñ shatei lammihngi baroh kawei.
Ïa kane ka prokram la pynlong ha ka jingïadon lang u Prof Nochovono Tase uba long u Principal ka College of Nursing haka jingdonlang u David T Umdor, SE bad Deputy Director (Admin) In-charge, ka Irene A Nongthraw, Nursing Superintendent ki Doctor bad ki samla Pule Nursing nalor kiwei kiwei de.
Ka jingïalang ka ai ka jingburom ïa ka jingaiti, jingsngewrit, bad ki jingnoh synñiang ba kongsan jong ki nurse ha ba sumar ïa ki nongpang bad kyrshan ïa ki rukom sumar ha kylleng ka pyrthei.
Kane ka sngi ka long ruh ka sngi kha jong ka Florence Nightingale, ha kaba iaka jingtrei jong ka la plie nongrim na ka bynta ka kam Nursing.
Ka Nursing Superintendent, ka Kong Irene A Nongthraw, ka la ai ïa ka jingkren halor ka phang pdeng “Our Nurses, Our Future, Empowered Nurses Save Lives”, da kaba pynksan ïa “ka bynta ba kongsan jong ki Nurse ha kaba pynkhlain ïa ki jingshakri ha ka koit ka khiah bad ban pynbha ïa ki jingmyntoi ba ioh ki paidbah lyngba ka jingsumar kaba tbit bad kaba sngewrit.”
Ia kane ka jingrakhe la pynkut da ka prokram pyninam iaki kolshor kaba itynnad ha kaba ki Nurse bad ki samla pule ki la iashim bynta da ka jingsngewtynnad bad da kaba pynpaw ia ka mynsiem jong ka jingiatylli.
 Nalin Mehta ula ban jur iaka jingdonkam ban ai jingithuh iaki Nurse kiba trei borbah ban shakri iaki paidbah ha ka koit ka khiah.){kind=link}