Dawa ka JSU ia ka Sorkar ban pyniasoh ia ka surok Bataw RBBJ sha ka High Speed Corridor

Shillong, Jymmang 14 : Ka Jaintia Students’ Union-South Border Zone, East Jaintia Hills, ha ka sngi Balang kala iakynduh ia u Symbud Myntri Rangbah ka tnad PWD (Roads) Bah Prestone Tynsong, ban dawa pyniasoh ia ka surok Bataw RBBJ bad ka High Speed Corridor ba thmu ban pyntrei.

Ka kynhun ka ong ba kane jingpyniasoh kan pynthikna ia ka leit ka wan khlem ka jingthut, kyntiew ia ka ioh ka kot jong ka thain bad pynduna ia ka por ha ka leit ka wan sha kylleng ki jaka jong ka Jylla.

Ka JSU ka la kdew ïa ka jingdonkam kaba kongsan ban pynïasoh ïa ka surok RBBJ kaba don mynta ha ka thaiñ Bataw bad ka surok 4-lane corridor kaban dang wan, ban pyntikna ba ki shnong ba marjan jong ka thaiñ Bataw kin ïoh jingmyntoi beit na kane ka jingtei. Ki shnong ki kynthup ïa ka Pynurkba Bataw, Umlangsha, Lakadong, Borghat bad Kwator.

Ka seng ka ong, “Ka jingpynïasoh ïa ka surok RBBJ kan ai ïa ka lad ia ki nongshong shnong jong ka thaiñ Bataw ban pyndonkam ia ka greenfield high-speed corridor ha ka leit ka wan.”

Halor ka jingktah ha ka ïoh ka kot, ka la ong, “Kane ka jingpynïasoh kan ai lad ïa ka jingkit kaba sted ïa ki mar rep bad kiwei pat ki mar sha ki jaka ba don ki karkhana kiba heh, kaba ïahap bad ka jingbuh jingmut jong ka sorkar ban kyntiew ïa ka ïoh ka kot jong ka thaiñ.”

“Ka greenfield highspeed corridor ka dei ka project ba la angnud, hynrei ka jingjop jong ka ka shong eh ba kumno ngi pynïasoh ïa ka bad ki surok shnong kiba don ha ka thain” ong ka JSU.

Ka kynhun ka la bynrap ba ki la sngewkmen ïa ka jubab jong u Symbud Myntri Rangbah ban pynïasoh ïa ka surok RBBJ da kaba ai ïa ka jaka rung kaba don lypa ha ki katto katne ki bynta jong ka thaiñ Bataw, kaban pyntikna ba ki nongshong shnong bad ki nongkhaii kin ïoh lad ban pyndonkam ia kaneka high speed corridor, bad kumta kan pynbun ïa ki jingmyntoi.

“U Symbud Myntri Rangbah u la shimkhia ia ka jingtyrwa bad u la kular ïa ka kynhun ba ka sorkar kan bishar ïa kaei kaba lah ban leh ha ka jingpyniasoh bala tyrwa kum shibynta jong ka jingpynbeit kane ka surok 4-lane,” ong ka JSU.