Shillong, Iaiong 09 : U President ka NPP Meghalaya bad Symbud Myntri Rangbah ka Jylla Bah Prestone Tynsong ha ka sngi Ba-ar, ula ong ba ka pisa T. 1 klur bala kurup ha Arunachal Pradesh kam dei satia ka pisa jong u Myntri Rangbah ka Jylla Conrad K Sangma.
Haba iakren bad ki nongthoh khubor, u Bah Prestone ula ong “Nga kwah ban iathuh ia phi ba ka pisa ba kurup da ki briew jong ka ECI kam dei satia ka pisa jong u Myntri Rangbah ka Jylla Conrad K Sangma, uba dei u National President ka NPP jong ngi”.
Ula ong ba ka kali kaba ka ECI kala bat kam dei ruh ka kali ba iawan lang bad ka kynhun u Myntri Rangbah ka Jylla bad ka pisa ba ym duna ia ka T.1.2 klur bala rah da kane ka kam kam dei ruh ka pisa jong ka NPP.
“Kine ki briew (ba shah bat) kila leit hi dalade namar ki don ki project ba ki pyntrei ha Arunachal Pradesh- Ngam dei ma nga u ban batai pyrshah ia kane-ka ain ka don bad mynta ka shong ha u Returning Officer bad u Deputy Commissioner ula shimti ia kane ka case. Kam shym la don kano kano ka jingleh bakla ia mynta” ong u Bah Prestone.
Haba pyntip ba kane ka kam ka hap hapoh ka jingkhmih ka ECI, une u Nongialam ka NPP ula ong ‘Ai ba ka ECI kan shim ia ki sienjam kat kum ka ain”.
