Mairang, Nohprah 21: U Lamphang ka Iingdorbar Thaw Ain ka jylla, u Bah Metbah Lyngdoh, hynne ka sngi Balang u la leit ban plie ia ka ‘Pig Multiplier Farm’ kaba dei ka jaka ri sniang jong ka tnat ri jingri ka sorkar jylla ha ka shnong Mawsawa, Eastern West Khasi Hills District.
Ha ka jingkren ka jong u kum u kongsan, u Bah Metbah Lyngdoh uba dei ruh u MLA ka thain, u la pynpaw ia ka jing sngewkmen kaba khraw ban ioh plie ia kane ka jaka ri sniang (Multiplier Pig Farm), ka projek kaba la urlong lyngba ka jingiatreilang jong baroh kiba iadei kam kum ka tnat Animal Husbandry & Veterinary, ka tnat PWD bad kiwei kiwei, u Sordar ka shnong Mawsawa, ki trai jaka bad ki nongshong shnong ka Mawsawa.
U la ong ba kane ka jaka ri sniang ka dei kawei na ki jingpyrshang jong ka sorkar ban kyntiew shuh shuh ia ka roi ka par jong ki paidbah kiba shong ha ki thain nongkyndong lyngba ka kam ri jingri.
U Bah Metbah u la kren ruh halor kiwei pat ki shlem treikam jong ka tnat Animal Husbandry & Veterinary hapoh Eastern West Khasi Hills District, kiba kynthup ia ka Vocational Training Centre kaba don ha Mawnai, kaba la ai jinghikai ia ki nong shnongshnong halor ka kam ri sniang, ri syiar bad kumta ter ter.
Ha kane ka sngi, u kongsan u la ioh ruh ban sam ia ki khun sniang bad ki khun syiar hapoh ka skhim Rural Backyard Piggery & Poultry Scheme sha ki nongioh bynta kiba la ia wan sha kane ka prokram.
Kiwei kiwei pat kiba la kren ha kane ka sngi ki kynthup ia u Syiem ka Hima Nongkhlaw Pa’iem P.M Syiemlieh, u Deputy Commissioner ka Eastern West Khasi Hills District Bah W. Nongsiej, I Director ka tnat Animal Husbandry & Veterinary Dr (Mrs.) A. Laloo, u Sub- Divisional Veterinary Officer, Mairang Dr. D. Lywait bad u Sordar ka shnong Mawsawa Bah Loving Star Mawlong bad kiwei kiwei.
