Ka NPP kan pynkylla ia ki jingeh sha ki lad ki lynti ha Manipur : Conrad

Shillong, Nohprah 03: U National President ka National People’s Party (NPP) u Conrad K Sangma u la ong ba ka Party ka long kaba la khreh ban mad ïa ki jingeh ha Manipur, ka jylla ka don mynta hapdeng ka jingkhih win namar ka jingbym shongsuk shongsaiñ bad ka jingbym skhem ka saiñ hima sima.

“Ki jingeh kin don beit, bad ki jingeh ki mut ruh ki lad ki lynti,” ong u Conrad haba kren shaki nongthoh khubor hadien ka jingpynkup burom ia u President ka NPP ka Jylla Manipur, u Dr Lorho S Pfoze.

Ha kane ka sngi la pynkup burom ruh ia u leader of legislative party u Rameshwar M. Singh bad u Chief Whip u Loken Singh bad arngut ki working president u Janghemlung Panmei bad u Noorul Hasan.

U Conrad u la bynrap ba ka party hapoh ka jingialam jong u Dr Lorho S Pfoze kan trei ban pynkylla ia kine ki jingeh sha ki lad ki lynti.

“Ngi kyrmen ba ngin lah ban pynkylla ïa kita ki jingeh sha ki lad ki lynti bad ban kiew kum ka Party” u la ong da kaba bynrap “Ka jylla Manipur ka ïaid lyngba ki por kiba eh bad kiba jynjar bad namar ka jinglong jingman ha ka thaiñ bad ka jinglong jingman khamtam ha kine ki ar snem shiteng, ka jingbym shngain haka shongsuk shongsaiñ baroh kawei, ka la don shibun kine ki jingeh ha ka saiñ hima sima bad ngi ngeit ba hapoh ka jingialam jong u Lorho kan sa pynbeit ban shim ia kita ki jingeh bad kaba kham kongsan ban pynkylla ia ki kumba nga la ong sha ki lad ki lynti na ka bynta ka seng baroh kawei.”

Ha kaba iadei bad ki jingkynthoh ba la pynpaw da ki nongialam ba rangbah jong ka Party, u Conrad u la ong, “Ngi burom ia ki jingkynthoh jong baroh ki nongialam ba rangbah jong ngi. Ka party jong ngi ka dei ka party synshar paidbah. Ngi ngeit ha ka jingai jingmut ne ka jingpynpaw jong baroh”.

Ka NPP ka pynleit jingmut ha kaba trei na ka bynta baroh ki jaidbynriew ha Manipur bad ka thain, la pynksan u Conrad da kaba ong, “Ngi dei ka Party kaba long kaba iatylli. Ngi ngeit ban trei na ka bynta baroh ki jaidbynriew ha ka jylla bad kumjuh ha ka thain.”

Ka thong jong ka Party ka long ban shakri ia ki paidbah ka Manipur bad ka thain shatei lam mih ngi jong ka Ri India, da ka jingangnud ban iatylli bad ka roi ka par. “Ngin sa iatreilang bad baroh bad peit ia ka jingmyntoi jong ka jylla Manipur bad ka thain shatei lammihngi baroh kawei,” la ong u Conrad.

“Ka jingshemphang jong u Dr Lorho kum u nongmihkhmat ha Parliament bad ka jingaiti lut jong u na ka bynta ki paidbah bad ka thaiñ ka pynlong ïa u kum u briew uba paka ban ïalam ïa ka NPP ha Manipur,” la ong Conrad.

U Conrad u la ban jur ia ka jingthmu jong ka NPP ban shakri ia ki paidbah bad ia ka thain, da kaba ong, “Ngi don hangne ban ai ia ka khubor kaba bha, ban pyniatylli bad phah ia ka khubor jong ka jingiatylli jong ka thain baroh kawei.”

Ka NPP ka thmu ban pynkhlaiñ ïa ka jingdon jongka ha Manipur bad ka thaiñ Shatei Lammihngi, ha kaba la khmih lynti ba u Pfoze un don ka bynta kaba kongsan ha kaba pynbeit ïa ka Party bad pynkhreh na ka bynta ka ilekshon 2027.

U Sangma u la pynthikna ia u Pfoze ia ka jingkyrshan jong National Committee, da kaba ong, “Ngin iatreilang bad phi ban pynthikna ba ngin lah ban pynlong ia ka Party ha ka lynti kaba dei bad kaba bha ia baroh”.