Shillong Nailar 10: U National Vice President jong ka National People’s Party (NPP) u Bah Prestone Tynsong ha ka sngi Balang u la pynpaw ba ka NPP kan ym iateh lok bad kano kano ka seng, hynrei kan iakhun hi iaka elekshon MLA ban wan bad kan ialam biang iaka sorkar ha u 2023.
U Bah Prestone u la kren ia katei hadien ba ka seng BJP kala pynpaw ba kam treh ban iatreilang bad ka NPP naka bynta ka elekshon MLA 2023.
“Nga kitbok kitrwiang iaka (BJP) bad ngi ruh ngim treh ban iatreilang bad ki ha ka elekshon ban wan. Ngim don lypa ia kano kano ka jingiasngewthuh jingmut bad no bad no ruh, ngin ieng hi beit kum ka NPP” ong u Bah Prestone haba iakren bad ki nongthoh khubor.
U la ong, kum katei ka jingkren kam shym la mih tang na ka seng BJP hynrei wat naka seng UDP bad kiwei ruh ki seng sain pyrthei kiba la pynpaw ba ki kwah ba kin iakhun hi iaka elekshon MLA khlem ka jingiatehlok bad kano kano ka seng.
“Kam don satia kata ka jingiasngewthuh jingmut lypa ne ban iatehlok bad kano kano ka seng, hynrei ngin sa shim ia ka rai hadien ba la dep ban niew iaka vote” ong u nongialam ka NPP.
U Bah Prestone u la ong, ka jingthmu jong ka NPP ka long kaba shai kdar bad kata ka long ban thaw hi iaka sorkar ha u snem 2023.
“Hadien ba la dep ka elekshon MLA, ngin sa thaw hi marwei iaka sorkar” la kob u Bah Prestone uba la ong ba ka jingiakhun ka NPP kan long pyrshah ia baroh hi.
“Wat nym ong, ba ka jingiakhun kaba tyngeh kan long hapdeng ka UDP bad NPP hynrei ka jingiakhun kaba tyngeh kan long hapdeng ki kyrtong ha man la kawei pa kawei ka constituency bad kan long kumta. Hynrei ngin leh bha bad ngin leh bha hi ruh ha ka rilum Khasi bad Garo” ong u Bah Prestone.
U la ong, ka sorkar MDA kaba la ialam da ka NPP kadei ka sorkar kaba nud ban shim ia ka rai ban pynbeit ia u pud u sam uba la sahteng 50 snem bad ka jylla Assam.
“Ngam iohi ba kan don kano kano ka jingktah haka elekshon ia kane ka sorkar kaba mynta bad phi lah iohi hi ba la 50 snem ruh ym shim la don mano man ruh kiban nud ban leh eiei ha kaba iadei bad u pud u sam, ia kaba ngi la lah ban leh. Nga tharai ba ki paidbah kila sngewthuh ba dei tang kane ka sorkar jylla kaba ialam da ka NPP ba watla ka mad iaki jingeh, kala shimkhia iaki mat kiba iadei bad ka ïap ka im jong u paidbah ka jylla Meghalaya” ong u Bah Prestone uba long ruh uSymbud Myntri Rangbah ka jylla.
