Nongpoh, Iaiong 09 : U President ka National People’s Party (NPP)-Meghalaya bad Symbyd Myntri Rangbah ka Jylla Bah Prestone Tynsong, ula kren shai kdar ba ka NPP kam dei satia ka Team-B jong ka BJP bad ong ba dei namar ka jingiatrei lang jong ka NPP ha ka Sorkar NDA ba ialam ka BJP, ba ka Meghalaya kala lait na ka jingtreikam ka Citizenship (Amendment) Act, 2019.
U Bah Prestone ula kren ia kane ha ka rynsan ialap elekshon ban pan jingkyrshan ia ka kyrtong ka NPP Kong Ampareen Lyngdoh, kaba long ha ka 8 tarik Iaiong ha Umsning.
“Ka jingiatreilang ka NPP bad ka Sorkar NDA kam mut eh tang ban ioh ia ki skhim/project ban kiew ka roi ka par jong ka Meghalaya. Ka thong ba hakhmat eh ka long ba ka NPP kan ioh jingtip bad kan ioh tynjuh ia ka Sorkar Pdeng lada don kano kano ka jingthmu ban pyntreikam ia ki ain thymmai kiban ktah ia ka Meghalaya” ula ong.
“Ka Jylla Meghalaya ka la lait na ka jingtreikam ka Citizenship (Amendment) Act 2019 namar ka jingdon jong ka NPP ban tynruh ia ka Sorkar Pdeng. Kane ka Ain kan treikam tang 2% ki jaka ha Jylla kiba don shabar jong ka Sixth Schedule” ula ong.
U Bah Prestone ula kynthoh ia kane halor ka jingmih ki jingkynnoh na kiwei ki seng sain pyrthei ba ka NPP ka dei ka team B jong ka BJP ne ka NPP bad ka BJP ki dei kajuh.
“Ka rai jong ka BJP ban kyrshan ia ki kyrtong ka NPP ha kane ka elekshon Lok Sabha ha Meghalaya, ka dei ka rai jong ki Nongialam ka BJP bad u Myntri Rangbah Duh ka Ri Narendra Modi, kiba don ka jingangnud ba ka kynhun synrop NDA kan ioh jingjop haduh 400 seat tam ha kane ka elekshon” ula ong.
Ula ong ba ka BJP ka shim ia kane ka rai namar ka jingsngew burom ia ki seng sain pyrthei kiba iatreilang ha ka kynhun synrop NDA.
“Ki paidbah ki dei ruh ban sngewthuh ia kiei kiba ka party NPP ka ieng bad ka trei. Ka NPP ka dei ka seng sain pyrthei kaba la suit la shor ban iada ia ki paid riewlum ym tang ha Meghalaya hynrei ha ka thain Shatei Lam Mihngi bad ka Ri India baroh kawei” ula ong haba bynrap “Ka NPP ka dei kaba buh shuwa ia u paidbah hakhmat duh bad kam ju shim satia ia kano kano ka rai khlem da shim ia ka jingmynjur u paidbah”.
Ha kane ka jingialap elekshon, la iadonlang ruh u Nongaiktien ka NPP Bah Himalaya Shangpliang, u CEM ka KHADC Bah Pyniaid Sing Syiem, u MLA barim ka Umsning Bah Jason S Mawlong, ka MDC ka Umsning Kong Magdalene S Mawlong, u MDC barim ka UDP Bah Donkupar Sumer bad kiwei kiwei.
Ha kane ka sngi, ka Kong M Ampareen Lyngdoh ka la pynlut por baroh shisngi ban rung sha ki phew tylli ki shnong bad ban ia kynduh ia ki nongialam shnong bad ki nongshong shnong lyngba ka prokram Road Campaign jong ka party NPP
