Shillong, Naiwieng 30: Ka kyrtong iakhun Eleshon Lok Sabha ka National People’s Party (NPP) na Shillong Kong Ampareen Lyngdoh kaba dei ruh ka Myntri Sorkar, kala ong ba ka NPP ka don iala ka jong ka jingithuh kum ka party bad kam don jing iadei eiei ruh em bad ka Bharatiya Janata Party (NPP).
Haba kren sha ki lad pathai khubor hadien ka jingialang bad ki nongialam na Rilum Jaintia, ka Kong Ampareen kala ong “Nga don hangne ryngkat bad ki mat jong ka Party bad nga ieng ban weng noh iaka jingshah kynnoh baka NPP ka don jingiadei bad ka BJP. Ka NPP ka don iala ka jong ka jingithuh. Ngim dei ban shah tap haki jingngeit kibalong pyrshah iaki paidbah ka Jylla. Ngi dei ka NPP bad ngi don lang haka NDA namar kam don kano kano ka jingma ban don lang haka NDA.
Ka MLA jong ka East Shillong constituency kala ong ba ka long kaba donkam bha ban khmih iaka niam.
“Baroh ki niam ki long kajuh hapoh Meghalaya. Ngi dei ban pyniaid ia kane ka jingsngew shakhmat bad ngim dei ban ong ba X, Y, Z ki don bynta bad kita kita. Ngi dei ban iatreilang ban weng ia kine baroh haka ilekshon ban wan” kala ong.
Haba kylli halor u MP naka Congress u Bah Vincent H Palam, ka Kong Ampareen kala ong “Nagm ieng hangne ban thew iaka kam kiwei, ngin ia kynduh haka jingiakhun. Ngi dei ki kyrtong naka bynta ka kam MP. Ngam kwah ban kren kaei ula leh, kaei kaba u khlem leh, ailad ba ki paidbah kin bishar”.
