Shillong Naiwieng 30: U Symbud Myntri Rangbah ka jylla u Bah Sniawbhalang Dhar, ula ong ba ka sorkar jylla ka dang peit ia ki lad ki lynti ban pynheh ia ka kad liengsuin kaba don ha Umroi bad mynta ka dang ap ban ioh ia ka kaiphod na ki Consultant.
“Hapoh shi bnai – arbnai, ngin sa ioh iaka kaiphod na ka Consultant bad ynda la ioh ia ka kaiphod, ka sorkar kan sa pyniaid shakhmat ia ka kam, namar ha ka kaiphod kaba nyngkong la pynpaw ba donkam haduh 6000 – 7000 ban pynheh ia ka kad liengsuin. Ngi kum ka sorkar ngim lah ban shaniah tang ha kawei ka Consultant bad ngi pyrshang ban iakren sa 2-3 tylli ki Consultant ba kin pynkhreh ia ka kaiphod khnang ba ngin ioh ban shim ia ka rai kaba biang eh” ong u Bah Sniawbhalang.
Ula ong baka sorkar jylla ka kwah ban pynheh iaka kad liengsuiñ kaba rim lada ka kaiphod kaba ka ioh pdiang ka pyni ba ka long kaba biang.
Haba kylli lada jia ba ka sorkar kam ioh jaka shuh ban pynheh iaka kad liengsuin, hato kan leit wad jaka noh shawei ban tei ia ka kad liengsuin kaba thymmai, u Bah Sniawbhalang ula ong, “Ngin sa ia peit bad ngin sa pyntip ia kaei kaba ka sorkar kan leh, hynrei ia mynta hi ngin ap shwa ban ioh pdiang ia ka kaiphod”.
