Shillong Naitung 01: U Symbud Myntri Rangbah Bah Sniawbhalang Dhar, ha ka sngi Balang, ula ong ba ka sorkar kaba la ialam da ka seng NPP kadei ka Sorkar jong ki paitbah bad kam don por ban peit ia ki jingkynthoh namar ba ka pynleit jingmut ha ki kam pynroi, haba kdew ba palat T.15,000 klur ki projek kidei kiba dang iaid mynta ha ka jingpyntreikam ha New Shillong Township.
Ula kren ia katei ha ka jingialang pynkupburom kaba la pynlong da ka Joint Action Committee ban ai khublei ia ka Sorkar Jylla halor ka One Time Settlement (OTS) Scheme na ka bynta ki kali kamai.
“Kum u nongialam u jong phi, ngim sngeweiei wat lada ki paitbah ki kynthoh jur ia ngi ha ki rynsan social media ne ha kiwei kiwei ki lad. Ngi don hangne ban shakri ia phi. Ka sorkar kaba ialam da ka NPP kadei ka sorkar jong u paitbah” ong u Bah Dhar.
“Ki don bun bha kiba kren sniew pyrshah ia ka sorkar, hynrei ngi ngim don por ban sngap ia kitei baroh. Ngi bunkam ban trei na ka bynta ki paitbah jong ka jylla. Ai ba kin kren katba ki sngew kwah ban kren, hynrei ngi don hangne ban trei na ka bynta ki paitbah bad ym ban sngap ia ka jingkren ka bym don nongrim satia” ula bynrap.
U Bah Dhar ula ong, ba ka sorkar ka ieng pynleit jingmut ha kaban ai ka jingshakri ha baroh ki liang.
“Peit ia ki kam kiba la leh da ka sorkar NPP ha kine ki 8 snem kiba la leit. Kaei kaba ngim shym la leh? Lada ngi iakren shaphang ka jingshna ia ki surok, koit ka khiah, ka bording elektrik, pule puthi bad ha jan baroh ki tnad sorkar, ka jingsam ia ki kam pynroi kala long kaba mar katjuh” ula ong.
Haba pynpaw ia ka jingiaid ki kam ha New Shillong Township, ula ong, “Ngi dang tei ia ka Administrative City bad ia ka Knowledge City ha New Shillong Township. Mynta la bun snem, ngi lah iai bteng ban iakren halor ka New Shillong Township hynrei kam shim la jia eiei pat. Ngam mut pat ban ong, ba ki sorkar kiba la dep kim shim la treikam, hynrei ka sorkar hapoh ka jingialam ka NPP, khie leit sha New Shillong bad phin sa iohi ia ki jingkylla kiba la sdang ban jia bad iaid shakhmat mynta”.
“Palat ia ka T.15,000 Klur jong ki projek kidei kiba dang iaid mynta shakhmat katba nga dang kren. La shna ia ki State Highways ha kine ki 8 snem kiba la dep” ong u Bah Dhar.
Ha kaba iadei bad ka OTS scheme, ula ong ba ka sorkar kala shimkhia ban kyrshan ia ki paitbah kiba don hapdeng jong ka jingeh.
“Haba phi mad ia ka jingeh kaba kum kane, kadei ka kamram jong ka sorkar ban iarap ia ki briew jongka. Kumta ngi lah pyntreikam ia kane ka scheme bad ngi kyrmen ba kan pynmih ia kiei kiei kiba bha. Kurup ia kane ka kabu kaba phi ioh” ula ong.
U Bah Dhar ula ong ba ka sorkar ka dang khmih bniah ruh ia ki jingsngewkhia kiba la pynpaw da ki briew kiba iadonbynta ha ka liang ka jingpynkit ia ki mar ki mata.
“Kala don ruh ka jingdawa ha kaba iadei bad ki kali ki bym don ia ki kot ki sla kiba biang. Ngi dang khmih bniah ia kane ka mat. Ki lah kyrpad ban shimkhia lem na ka bynta ki kali ki bym don ia ki kot ki sla bad nga lah ong ia ki ba ngin sa khmih bniah ia kane ka mat” ula ong.
Ula kyrpad ia ka jingai ia ka jingiatreilang bad ki ophisar bad ka banjur ia ka jingkongsan jong ki nongniah trok. Nga sngewthuh ia kane ka mat bad nga kyntu ia phi ban iatreilang bad ki ophisar ki jong ngi. Kaei kaba ngi lah ban leh ngin leh beit bad ngi donkam ia ka jingiatreilang khnangb ka kam kan iaid beit iaid ryntih” ong u Bah Dhar.
“Ki nongniah trok ki long kiba kongsan bha ia ka jylla. Khlem ma phi, ka jylla jong ngi kan ym lah ban kiew. Khlem ka Trucker Associations, ngi ngin ym lah ban pyndap pynbiang ia ka jingdonkam jong ka jylla bad ki paitbah” ula ong.
Da kaba iada ia u Symbud Myntri Rangbah ka Jylla u Bah Prestone Tynsong halor ka jingshah kynthoh ha ki rynsan social media, u Bah Dhar ula ong, “U Symbud Myntri Rangbah ka Jylla u Bah Prestone Tynsong u long uba kloi ban ai ka kti jingiarap. Um ju ong em hynrei wat hapdeng jong katei, u shah kynthoh ha ki rynsan social media.”
Haba iengskhem halor ka jingshimkhia ka sorkar ia ki mat kiba kongsan, ula ong, “Ki nongialam ka NPP kila buh shwa hakhmat eh ia ki paitbah ym ia ka bor. Kane ka sorkar kaba ialam da ka NPP hapoh ka jingialam u Conrad K Sangma. Phi lah iohi kumno ka jylla kala iaid shaphrang ha kine ki 8 snem kiba la dep. Ngi lah iaid ha ka lynti kaba dei. Ai ba ki paitbah kin kren kat kaba ki sngew kwah ban kren, hynrei ngi ngin ym iapeiñ pat ba kan ktah ia ka bha ka miat jong ki paitbah” ula bynrap.
Ha katei ka prokram, ki nongpyniaid kila pynkup burom ia u Myntri Rangbah ka jylla u Conrad K Sangma ryngkat bad ia ki Symbud Myntri Rangbah ka jylla u Bah Prestone Tynsong bad Bah Sniawbhalang Dhar ha kaban ai jingithuh ia ka kamram kaba kila leh na ka bynta ban pynytreikam ia ka OTS scheme.
