Shillong, Naiwieng 10: Bun ngut ki rangiakura ba pawnam ha ka ri kin wan poi mynta u bnai ha ka nongbah Shillong ban iashimbynta ha ka 7th Elite Men’s National Boxing Championship bad kane ka jingiakob ka long ruh kum ka jingpynkhreh ki rangiakura ka ri India ki ban iashimbynta ha ka Olympic 2024.
Ha katei ka jingiakob kura yn wan ban iashimbynta da palat 35 ngut ki nongiakura ha ki 13 tylli ki kyrdan kaban long ha SAI Indoor Stadium jongka NEHU Campus, kaban sdang haka 25 tarik u Naiwieng haduh ka 1 tarik u Nohprah.
Ia kane ka jingiakob yn pynlong da ka Meghalaya Boxing Association (MBA) bad ka Boxing Federation of India (BFI) ia kaba la bei tyngka da ka tnad Sports and Youth Affairs jong ka jylla Meghalaya.
Haba iakren bad ki nongthoh khubor shaphang katei ka lympung ialehkai, la ioh ia ka jingbatai kaba bniah na u President ka MBA u Bah Cornelius Kharhunai, u Tournament Organising Secretary bad Joint Secretary jongka BFI Bah Larry Kharpran, u Joint Secretary ka MBA Bah Khrawkupar Kharmawphlang, Secretary ka MBA Bah Dondor Marwein bad Treasurer ka MBA Bah Daniel W Marbaniang.
U Bah Kharpran ula ong ba ki nongiakura na ki 30 tylli ki jylla bad ki Union Territory bad ki Sports Promotion Boards kin wan ban iashimbynta ha ki kyrdan kiba naduh ka 46kg haduh ka 92kg.
Ula ai khublei ia u Myntri Rangbah ka jylla u Conrad K Sangma, u Commissioner and Secretary ka Sports and Youth Affairs Dr Vijay Kumar D bad ka Director of Sports and Youth Affairs ka Kong Isawanda Laloo kaban long ruh ka Chairperson jongka Tournament Organising Committee.
Ki kato katne ki rangiakura kiba pawnam kiban wan iashimbynta ki kynthup ia u Shiva Thapa uba la iakhun arsien ha ka Olympic bad 6 sien ha ka Asian Championship bad ruh uba la ioh khur ia ki takma, u Lahduh ha ka 2018 Asian Games u Amit Panghal bad u Rohit Tokas uba la ioh iaka takma rnong ha ka 2022 Commonwealth Games.
Nalor ki nongiakura kin don ruh palat 100 ngut ki Coach bad 60 ngut ki Technical Officials ha katei ka jingiakob bad kane kan pynlong ia katei ka jingiakob kaba shongkun kaban long ha ka nongbah.
Ka jingpynkhreh na ka bynta katei ka jingiakob kala iaid shakhmat ha kaba la thaw iaka Organising Committee kaba kynthup ia ki dkhot jong ka MBA bad na ka Tnad Sports and Youth Affairs bad la mang ban pynlut T.1 Klur ia kane ka jingiakob kaban kynthup ia ka bam, jaka sah, ka leit ka wan bad kiwei kiwei.
Na ka liang u Bah Kharpran ula pyntip ba naduh lashai ka sngi kan sdang ka jingjied ia ki rangiakura kian mihkhmat ia ka Meghalaya bad la khmih lynti ba ka jylla kan sei 10 ngut ki nongiakura kiban iashymbynta ha kateika lympung iakob kura.
“Ka jingiakhun kan long kaba eh bha hynrei ngi kyrmen skhem ba ki nongiakura ki jong ngi kiba la leh bha ha ka East Zone Elite Men’s Boxing Championship ha u Nailar kum u Badonkupar Synnah bad u Sanjeev Maskul, ki lah ban ioh khur ia ki takma ha kane ka jingiakhun kaban long hi ha kane ka jylla” ong u Bah Kharpran.
