Shillong, Naiwieng 10: Da ka jingthmu ban kyntiew iaka sap rwai tynrai ki khynnah skul ha ka jylla, ka tnad Arts & Culture ryngkat bad ka Shillong Public School, ha ka sngi Palei kila pynlong ia ka State Level Inter-School Traditional Singing Festival & Competition ha Lariti Performing Centre,Mawdiangdiang.
Ia katei ka jingiakob rwai tynrai la pynlong ha ki 3 kyrdan kaba kynthup ia ka Solo, Duet bad Group ha kaba la wan ban iashimbynta da bun tylli ki skul kiba na kylleng jong ka rilum Khasi bad Jaintia.
U Commissioner & Secretary ka tnad Arts & Culture u Bah FR Kharkongor kum u kongsan ula sam ia ki khusnam sha ki nongjop ha kane ka jingiakob bad ula pynbna ruh ba ki nongjop ha kane ka jingiakob kin ioh ia ka lad ban pyni iaka sap rwai ka jongki, ha ka sngi sdang jongka Jan Jatiya Gaurav Divas kaban long ha ka 15 tarik u Naiwieng bad ha ka Tri Hills Ensemble programme kaban long ha ka 24 tarik u Naiwieng kaba dei ka prokram kaban pynlong da ka tnad Arts & Culture jong ka jylla.
Haba phai sha kane ka jingiakob, ha ka kyrdan Solo ia ka nam lahduh la iohrah da ka Meghalaya Police Public School, Baar ka St Edmunds School bad balai la ioh da ka Pariong Presbyterian Higher Secondary School.
Ha ka Duet ia ka nam lahduh la ioh da ka St Marys Higher Secondary School, baar la ioh da ka Meghalaya Police Public School bad balai la ioh da ka St Edmunds School.
Ha ka Group ia ka nam lahduh la ioh rah da ka St Edmunds School, ka Seven Set Higher Secondary School kala wan Baar bad ka Meghalaya Police Public School kala wan Balai.
Ha kane ka sngi ka KC Lights Choir kaba la ioh dang shen 2 tylli ki takma ksiar ha ka International Choir Competition kala pynsngewtynnad ia baroh lyngba ki jingrwai ki jongka.
