Shillong, Rymphang 23 : Ka Meghalaya kala pynmih bad aikam haduh 3.66 lak ngut hapdeng u snem 2019 bad 2025, haba kdew ia ka jingkhein bala leh kat kum ka KLEMS ha ryngkat ka rukom treikam ka Reserve Bank.
Ia kane la pyntip da u Myntri Rangbah ka Jylla Conrad K Sangma haba jubab ia ka jingiatai halor ka jingkren lamphang u Lat ka Jylla hapoh ka Dorbar Mang tyngka hynne ka sngi Nyngkong.
Ka rep ka riang ka ai haduh 1.90 lak ka kam, ka floriculture (thung soh, rep syntiew) ka ai 789, ka jingthut tit-4,078, ka jingthung soh- 12,714, ka rep organic-47,927 bad ka Lakadong Mission-15,333, kaba synniang sha kane ka thup baroh lang.
“Man ki district kila ioh jingmyntoi” ong u Conrad haba pynpaw ba ka jingaikam ha ka rep Organic ha West Garo Hills kala kot 5,270, Ri-Bhoi-4301, bad East Khasi Hills-4728. Ki Hotel kila aikam haduh 12,683 ngut, ka kam niah kali-9835 bad ka kam pynmih mar bad recycling-24,926.
U Conrad ula iathuh ba ki skhim ka Jylla kila kyrshan ia kumba 10,000 ngut ki briew hapoh ka YES Meghalaya, 11.050 hapoh ka Aqua Mission, 1.7 lak hapoh ka CM-CARE bad 9000 haduh ka PRIME, kaba jan kot sha ka 8 lak ki nongioh jingmyntoi baroh lang.
“Ka long kaba eh ban pynhun ia baroh hynrei ngi la pyrshang” ula ong.
Halor ka jingsiew bainong, u Conrad ula ong ba ka Meghalaya Minimum Wage ba T.525 ka dei ka jingsiew ba wan ba-ar ha ka jingbun tam hapoh ka Ri hadien jong ka Karnataka kaba long T.581 bad ka dei ruh kaba heh duh ka jingsiew ha ka thain Shatei Lam Mihngi.
“Kane ka pyni ia ka jingthmu jong ka Sorkar….ban kyrshan kat kaba don ka lad ka lynti ia ki nongshongshnong kiba duk na kiba duk tam” ula ong.
Nalor kane, u Conrad ula iathuh ba ka Meghalaya mynta ka dei ka Jylla ba wan ba-ar ha ka jingkiew sted ka ioh ka kot hapoh ka Ri kaba kot haduh 9.66% ka jingkiew ka GSDP, hadien ka Tamil Naduh kaba kot 11.91 %.
“Kane ka dei ka kam kaba da sngewhun shisha….ki jingpyrshang bala leh ha kine ki phra snem bala leit, kala lam sha kane ka jingkiew shaphrang” ong u Conrad haba bynrap ba ka Jylla ka pynneh ia ka jingkiew ba 10% ha kine ki lai snem.
“Ka Sorkar kala buh ia ka thong ba kot T.85,000 klur ka GSDP, lane kumba $10 billion ka ioh ka kot.
Ula kubur ba ka per-capita GSDP ka dang rit, ha kaba ka Meghalaya kala kiew na ka kyrdan 28 ha u 2019 sha ka 26 mynta, bad kdew ia ka jingkha roi ka jingdon paid da 0.95%.
“Ngi don ha ka kyrdan ba 5 hapoh ka ri haba phai sha ka jingkiew ka per-capital GDP ka Meghalaya hapdeng u snem 2019-2025” ula ong “Tangba ngi kham biang mynta ban ia kaei kaba long ha u snem 2018”.
U Conrad ula pynpaw ruh ba ka kam ba nyngkong eh bala pynioh da ka Sorkar jong u ka dei –ka State Anthem bad ka Shap ka Jylla (symbol) hadien 50 snem, ka jingpynim ia ki project bala rim kum ka Crowborough Hotel bad ka Iing Dorbar Thaw Ain ba thymmai.
U Conrad ula kren ruh halor ka jingtynruh ka Sorkar ia ka kam sengkam lajong bad ka pynioh kam kum ka PRME bad CM-Elevate, haba ban jur ba ka jingroi ka dei ban nang pynbha ia ka jingim jong ki nongshongshnong.
Ha kajuh ka por, u Myntri Rangbah ula pynbna ba ka Sorkar kan tei ia ki Iing na ka bynta ki longiing ba duk ki bym lah ban thied jaka, haba pynpaw ba kane ka plan ka pyni ia ka jingthmu ban pynthikna ba “kiba duk na kiba duk tam kin nym shah ieh shadien”.
