Shillong, Nailur 19: Kum shi bynta ban pynlong ia ka jylla Meghalaya kum ka shlem ialehkai football ha ka ri, ka Northeast United Football Club ha ryngkat ka jingkyrshan ka sorkar jylla, kan seng ia ka Residential Football Academy ha Mawkhanu, New Shillong Township.
U Myntri Rangbah ka Jylla Conrad K Sangma ha ka sngi Palei, haba pdiang burom ïa ka kynhun ïalehkai ka Northeast United sha ka Jylla hadien ba jop ïa ka Durand Cup 2024 ula ong, da ka jingwan jong ka Residential Academy kan long ka jingmyntoi kaba khraw ïa ka jingialehkai phutbol ha ka Jylla baroh kawei.
“Ngi pynlong ia bun ki prokram kynthup ïa ki prokram ha ki shnong ki thaw ban sei pyrthei ïa ki sap jong ki khynnah kiba dang rit ha ka rta bad ban kyntiew ïa ki, kumta bun kiei kiei kin sa jia bad ngi khmih lynti ba kan iaid shakhmat kane ka jingïatreilang”, ong u Conrad Sangma.
Ha ka jingiakren bad ki nongialehkai, u Myntri Rangbah ka jylla ula ong, ba man la uwei pa uwei u nongialehkai ka Northeast United FC ki long ki khlur na ka bynta ki samla jong ka jylla Meghalaya.
“Da kaba iatreilang bad ngi ka jylla kam dei eh tang na ka bynta ka jingialehkai hynrei kadei na ka bynta ban wanrah ia ka jingkylla kaba ngin sa iohi naka bynta ki khynnah kiba kwah ban iohi ba kin phong iaka Jersey bad ban ialehkai naka bynta ka Northeast United bad lehse ban mihkhmat ia ka ri India ha kakyrdan kabaheh” ong u Myntri Rangbah.
Lah ban kdew ba haka14 tarik u Lber ka sorkar jylla kala iasoi iaka jingiatehkular bad ka Northeast United FC ban seng ia ka Residential Football Academy ha New Shillong bad ka sorkar kala mynjur ban ai ia ka jaka kaba 15 akar ia katei ka kynhun ialehkai.
Ka Meghalaya Tourism kadei ka nongbei tyngka naka bynta katei ka Football Club ha kine ki ar samoi kiba la dep.
U CEO ka Northeast United u Mandar Tamhane haba iakren bad ki nongpathai khubor, ula ong ba ka jingioh jingkyrshan ka Cliub na ka sorkar ka long kaei kaei kaba ym pat ju iohi koit ha kino kino ki jylla jong ka ri India.
“Ngi dap da ka jingkmen ba ka sorkar Meghalaya kan ai ia ngi 15 akar ka jaka shabar jongka nongbah Shillong ban tei ia ka Residential Academy”, ong u Tamhane.
Ula pyntip ba ka club kala iatrei ryngkat bad ka tnad Tourism ka jylla Meghalaya ban poi sha ki district bapher bapher ban kyntiew iaka jingialehkai football ha ki shnong ki thaw.
