Dei ban panmap kito kiba pynbudnam sniew ia ka Meghalaya : Conrad
Shillong, Jylliew 09 : U Myntri Rangbah ka Jylla Conrad K Sangma ula iai ban jur ba ka Meghalaya ka dei ka jaka kaba shngain tam ia ki nongwan shangkai haba pynthikna ba ka Sorkar kan buh hakhmat eh ia ka jingshngain ki nongwan kai bad pyntreikam ia ki lad ki lynti kiban nang pynjanai shuh shuh ia ka jingshngain.
U Myntri Rangbah ula kynthoh ia kane halor ka jingshah kynnoh bad shah pynbudnam sniew jong ka Jylla Meghalaya ha ki rynsan social media bad ki lad pathai khubor, ba ong ba ka Meghalaya ka dei ka bym shngain bad ba jyllei ki kam bymman hadien ka jingshah pyniap uwei u nongwankai na Indore Raja Raghuvanshi, uba wan leh honeymoon bad la ka jong ka kurim sha Sohra.
U Myntri Rangbah ula pyntip ruh ba ki lad kiba ka Sorkar kan shim na ka bynta ka jingshngain shuh shuh ki nongwan kai kan kynthup ia ka jingpyndait kham bun ki kor CCTV bad ka jingai jinghikai ia ki tourist guide da ki kor ka juk ba mynta.
Ha kajuh ka por, u Myntri Rangbah ula ai ka jingkhublei ia ki Pulit ka Jylla halor ka jingsted treikam bad ka jinglong bniah ka jingtohkit, kaba lam sah ka jingiohkem ia ki 4 ngut ki runar ba donkti ban pyniap ia u Raja Raghuvanshi, kaba lam ruh sha ka jingwan pyndem hi dalade ka kurim, ka Sonam Raghuvanshi kaba jah rngai lang bad u kurim ha Sohra.
Haba kren sha ki nongthoh khubor, ula ong ba ia kane ka case la sei madan hapdeng ki jyrwit jyrwat kiba bun bha bad ka burom ka leit sha ki Pulit halor ka jinglap ia ki sakhi kiba khlain, kaba lam lynti sha kine ki runar kiba donkti ha kane ka kam bymman.
Ka jingtohkit ki Pulit kala shem ba ka kurim u Raja, ka Sonam Raghuvanshi kala thong pisa ia ki nongpyniap briew ba kin pyniap ia u kurim jong ka. Ia kane ka jingkhynra la leh da ka jingiarap jong ki Pulit ka Madhya Pradesh bad Uttar Pradesh bad kumjuh ruh ka Intelligence Bureau.
Ka jingpanmap ia ki paidbah ka Meghalaya
U Myntri Rangbah ka Jylla ula dawa ruh ia ki briew bad ki lad pathai khubor kiba kynnoh ia ka Sorkar Jylla bad ia ki Pulit khlem ka sakhi, ban pan map namar ka jingpynbudnam sniew ia ka Meghalaya.
Ula pyntip ba ka nam jong ka Jylla kum ka jaka ba long paralok ia ki nongwan shangkai ka dang iai neh kumba ka long bad ka Sorkar kan nang shim shuh shuh ia ki lad ki lynti ban kham pynjanai ia ka jingshngain ki nongwan kai.
“Ka Meghalaya ka dei ka jaka kaba shngain bad ngin pynthikna ba kan iai neh kumta. Ngin shim ia ki jinghikai na kiei kiba la jia bad ngin bteng ban nang pynjanai ia ki lad ki lynti jong ka jingshngain” ong u Myntri Rangbah.
