Shillong, Naitung 15 : U MLA ka Pynthorumkhrah bad Nongialam ka BJP Bah Alexander Laloo Hek ha ka sngi Balang ula ong ba ki Ophis Sorkar kim dei ban kylla long ki jaka mane Blei.
Kane ka jingkynthoh jong u kala mih tang shisien hadien ba ka Khasi Students’ Union (KSU) kala khang tala ia ka mandir bala shna ha phyllaw ka Central Bureau of Investigation (CBI) ha Shillong bad dawa ban pynpra noh ia ka hapoh ka shitaiew.
Haba kylli halor ka jingleh ka KSU, u Bah Hek ula ong ba kane ka kam ka dei satia halor ka jingkyrshan ne jingpyrshah ia ka jingpynsangeh ia ka jingtei.
Hynrei, ula pynpaw ia ka jingsngew shimet ba ki jaka mane blei kim dei ban don ha ki jaka treikam paidbah.
“Ki jaka mane Blei ki dei ban don ha ki jaka shimet, ym ha ki jaka shakri paidbah la ka dei ha ki Ophis ka Sorkar Jylla lane Sorkar Pdeng” ong u Bah Hek.
Une u Nongthaw Ain ula pynksan ba ki Ophis ka Sorkar lane jaka paidbah ki dei kiba rung ba mih ki briew kiba dei na ki jaidbynriew ne niam bapher bapher.
