Shillong, Iaiong 15 : U President barim ka NPP Meghalaya bad MP ka Rajya Sabha Dr WR Kharlukhi ha ka sngi Ba-ar, ula ong ba ka kam wanrah lynti rel ha ka jingshisha kala kut naduh ba ka Sorkar Jylla kala pynphai ia ka T.200 klur bala mang da ka Sorkar Pdeng ban thied jaka na ka bynta ban shna lynti rel ha Jylla.
“Ka Sorkar Jylla kala pynphai ia ka pisa kumta ka mat kala kut noh hangne” ong u Dr Kharlukhi haba iakren bad ki nongthoh khubor haba ai jingkynthoh ia ka rai jong ka Sorkar ban thaw ia ka All Party Committee ka ban shong bishar ia ka kam pyniasoh lynti rel ha ri-lum Khasi bad Jaintia.
“Mynta ba ki (Sorkar) la pynphai ia ka pisa nangne pat ki ioh biang ia ka pisa?” ula ong.
Kat kum ka jingong jong u, kane ka jingialang ka All Party Committee lehse ka lah ban dei na ka bynta ka jingwanrah ia ka project lynti rel hadien habud.
Halor ka rai jong ka VPP ban nym iashimbynta ha ka All Party Committee ban iakren lynti rel, u Dr Kharlukhi ula ong “Kaei kaba ka Sorkar ka donkam ka dei ia ka Liang Pyrshah kaba tei. Ngam tip satia ba da ka jingbym iadonlang ha kane ka Committee kan dei kaba tei ne ka ban pynjot”.
