Nongkasen, Risaw 9: Ka Iewthymmai Domsohshan Sport Club Eastern West Khasi Hills District, ha ka sngi saitjaiñ jong ka taiew ka la ïoh ban pynlong ïa ka Inter House Football Tournament 2022, ha kaba la wan ban ïashimbynta da ki 6 tylli ki kynhun bapher bapher kiba don ha ka thaiñ.
Ïa kane ka lympung ialehkai la plie pyrda da u President ka HYC Mawthadraishan Circle Samla Shembor Langrin.
Haba kren kum u Kongsan u la ong ba ka kam ïalehkai Phutbol bad ki sports ha kane ka juk kaba mynta kam dei shuh tang kum ka kam biria, hynrei ka la dei ka lad ban ïoh kam ïoh jam, ban im ja na bynta ki samla donsap.
U la kyntu ruh ïa ki rang ïalehkai jong baroh ki kynhun ba kim dei ban leh kamkai ïa ka sap ba u Blei u la ai ha ki, hynrei ban pyndonkam hok bad ban trei minot bad ban poi sha ka thong. U la ong ruh ba ki rang ïalehkai ki dei ban kiar ïa ki jingmlien ba sniew kum u Drug, ka Kyiad bad u Sikret, namar lada donsap ne tbit katno katno ruh, wei ba la ngop ha kine ki jingmlien ba sniew kim poi shuh sha ka thong.
Na ka liang ka HYC Mawthadraishan ka la noh synñiang da ki bol ryngkat bad ka pisa na bynta ban ai mynsiem bad kyrshan ïa kane ka Sports Club. Ha kane ka jingïalehkai football kaba nyngkong, ka Nangkiew ka la khur ïa ka nam jop da kaba ka la pynliem noh ïa ka Young Boys.
