Shna ka Sorkar ia ka hydel project ba 3 MW ha Riangdo
Shillong, Rymphang 06 : U Myntri ka tnad pynmih bording Abu Taher Mondal ha ka sngi Ba-ar, ula ong ba ka Jylla ka dang don ha ka khep bym pat mad jingeh satia haba phai sha ka jingpyndap bording watla ka shaniah tylli ha ki hydro power project.
“Ka jingpynmih bording jong ngi ka dei beit tang na ki hydro power project bad ka bhah ba ioh ia ka Sorkar Pdeng hynrei ngim pat don satia ha ka jingkhuslai ban pyndap bording” ong u Mondal haba iakren bad ki nongthoh khubor.
“Hynrei, ngi la shong bishar ia ka (kam pynmih bording) manla ka taiew bad ngi la pyrshang ban khmih ba kumno ngin lah ban pynduna bad lait na ka jingpynlip bording” ula ong.
U Myntri ula pyntip ba ka Tnad kala pyntrei mynta ia ka hydel power project ba 3 megawatt ha Riangdo, West Khasi Hills khnang ban nang lah pynmih tam ia ka bording.
“Ka don ka jingai jingmut ki stad ki jhad ba ngi lah ban pynkylla ia kane ka project sha ka 6 MW bad ngi dang shong bishar ia ka shuwa ban shim rai” ula ong.
U Mondal u pyntip ba ka Tnad ka dang pynkhreh ia ka Detailed Project Report (DPR) ban pyntrei ia kiwei pat ki mini hydel project hapoh ka Jylla.
U Myntri u pyntip ruh ba ka Tnad kala khot tender ban pyntreikam ia ka Chief Minister Solar Mission ha Jylla.
