Shillong, Rymphang 14: Ka Deputy Commissioner (DC) ka East Khasi Hills Kong R.M Kurbah, ha ka sngi Balang, kala kyntu iaki paidbah ba ki dei ban long kiba la kloi ban ai jingiarap iaki ba ngat haki jingjia aksident, ym ban lap miet ban ring video ne shon dur.
Ia kane ka Kong R.M Kurbah kala kren ha jingrakhe iaka National Road Safety Month 2024 ban pyn sngewthuh ia ki paidbah ha kaba iadei bad ka rukom ñiah kali.
Ia ka National Road Safety Month la pynlong daka tnat District Transport Officer (DTO) East Khasi Hills naduh 12 tarik bad la pynkut hynne ka 14 tarik Rymphang haka jingdon lang u SP Traffic ka EKH u K Prasad, ki bor district, ki ophisar jong ka ophis DTO bad ki nongialam jong ki Association niah kali na sor bad khap sor.
Haba kren ha kane ka sngi, ka Kong R M Kurbah ka la kyntu ia paidbah ba ki dei ban long kiba kloi ban iarap ha ka ban pynkit iaki ba ngat ha ki jingjia aksident sha ki jaka ai jingsumar ym ban lap miet ban shondur lane ring video.
Ka la pynkynmaw ruh ia ki nongñiah kali ba haba niah kali, ki dei ban sngewthuh ba ki buh ia ki jingim jong kiba shong kali ha ki kti jong ki bad kyntu ba haba niah kali dei ban long kiba phikir bha bad niah husiar ban lait na kino kino ki jingjia ba sngewsih.
Naka liang u SP Traffic ka East Khasi Hills u K Prasad ula pyntip ba ha u snem 2023 tang ha Shillong ,kila don kumba 46 tylli ki jingjia takhuh kali bad napdeng kine ki jingjia, haduh 40 tylli ki dei kiba shim ia ki mynsiem briew.
U SP ula pyntip ba tang ha u bnai Kyllalyngkot 2024, la ioh jingkheiñ ba ki don haduh 6 tylli ki jingjia ia tyngkhuh kali bad na kine ki jingjia, 6 ngut ki mynsiem briew kila khlad bad la kumba 13 ngut kila mynsaw jur.
Ula iathuh ba ki daw ba jia aksident kidei namar ka jingniah kali khlem akor bad ka jingshim Overtake khlem da peit bha.
Kiwei pat ki nongkren kila ban jur halor ka jingbud tdong ia ki Ambulance ne kali VIP haba don ka jingdheng kali bad ong ba ka jingbud tdong ia ki Ambulance bad kali VIP ka dei kaba buh jingma bha ia kiwei pat ki nongniah kali khamtam kiba wan mar pyrshah. “Kaei kaban jia lada don kiba mih kynsan ki kali arshaka” kila ong.
Kila ong ba kane ka jingbud tdong ka dei tang ka jingkhyllew, jingsngew sarong ba tbit niah kali bad jingniah shongshit khlem da pyrkhat pat ba ka lah ban buh jingma ia kiwei.
Kila kyntu ia ki nongniah kali ba kin ym mlien shuh ban budtdong ia ki kali siren ioh ka wanrah ia ki jingjia ba sngewsih
