Guwahati, Naitung 30 : U Myntri Rangbah ka Assam Himanta Biswa Sarma ula ong ba ka jingwan rung jong ki jaidbynriew Rohingya na Myanmar ha ka thain Shatei Lam Mihngi ka Ri, ka long kaba ishyrkhei.
Haba iakren bad ki lad pathai khubor, u Himanta ula ong “Ka don ka jingtreikam jong ki briew kiba wanrah ia ki Rohingya sha Tura bad nangtei pat sha Assam bad sha kiwei ki bynta jong ka Ri. Ki Pulit jong ngi kila don ha Tripura bad kila iatreilang bad ka Sorkar Jylla ban leh eiei pyrshah ia kine ki briew”.
Ki Pulit ka Tripura kala pathai ia ka khubor lyngba ka Twitter hadien ba u Myntri Rangbah ka Assam ula kren halor ka kam ki Rohingya ha Assam bad ong ba tad haduh u bnai Jylliew, na baroh ki 354 ngut ki nongwei ba wan rung kynthup ki Rohingya, ki Pulit ka Tripura kila ioh kem bun ngut ki briew kiba iarap ban wan ialam ia kine ki jaidbynriew sha India.
U Myntri Rangbah ka Tripura Manik Saha ha ka Dorbar ba dang shu kut ka Iingdorbar Thaw Ain ula ong ba na ka 856 Km ka jaka khappud hapdeng ka India bad Bangladesh kaba don ha Tripura, kumba 50 Km ka dei ka bym lah satia ban ker sainar namar kiba bun ki daw kynthup ruh ka jingpyrshah na ki shipai Border Guards Bangladesh.
U Myntri Rangbah ula ong ba haduh 18 battalion ki shipai BSF kila don ban pahara ha khappud ka India-Bangladesh ha Tripura bad ki Pulit ha ka jingiatreilang bad ki BSF, kila pyrrkhing bha ia ka rung ka mih ha ki shnong khappud ban the lakam ia ka jingwan rung, khaii tuh, jam par bad kiwei kiwei ki kam bymman.
