Shillong, Naiwieng 04: Ka Myntri ka tnat ka rep ka riang ka Kong Ampareen Lyngdoh, hynne ka sngi Saitjain, kala plie iaka Meghalaya Pavilion ha ka ‘World Food India 2023’ ka ban long haduh 3 sngi ha Nongbah New Delhi.
Lah ban kdew ba ia u snem 2023 la rakhe kyrpang kum u snem jong u Krai (Millets) daka jingthmu ban khring ia baroh kiba don bynta ban kyntiew ia une u jait marbam.
Haba plie paidbah ha kane ka sngi ka Kong Ampareen kala ong “Kane ka sngi ka long kaba donkam namar ka long kum ka jing pyniajan iaki nongrep bad ki Cooperative Societies. Ki kam baka Sorkar Meghalaya kala leh ha ki snem bala dep kala paw mynta ka sngi bad haka jingiakren bad ki nongrep bad ki nongseng kam lajong, nga sngew kmen ban ioh jingtip ba ki don kiba ioh nong bha na kane ka kam. Kane ka ‘World Food India 2023’ kan dei ka jingiakynduh hapdeng ki 14000 ngut ki nongthied bad ki nongrep ka Meghalaya bad nga ai khublei ia baroh ki ophsiar ka tnat ka rep ka riang kiba la pynlong ia kane ka sngi, ka sngi jong ka jingjop”.
Naka bynta ban kyntiew iaka ioh ka kot ki nongrep, ka Sokar Meghalaya kala soi ruh ka Memorandum of Understanding (MoU) bad ka Lulu Groups haka jingkyrshan ka Apeda jong ka tnat Ministry of Agriculture and Farmers’ Welfare naka bynta ban kyntiew bad ban iarap die iaki mar rep jong ka Meghalaya shaki ri jong ka GCC.
Lyngba ka jingiasoi MoU, ki nongrep ka Jylla ki lah bankynduh ia ki nongthied na kylleng ak pyrthei khamtam ban die ia u Sohtrun, Sohphan, Shynrai, u Syieng bad kiwei kiwei de.
Lah ban kdew ba u Myntri Rangbahduh ka ri u Narendra Modi ula plie iaka World Food India 2023 haka 3 tarik mynta u bnai bad ha kane ka sngi ula ong ba kane kan dei ka jingplie lad iaki nongrep ban kyntiew iaka jingioh nong daka ba die iaki mar rep kiba pynmih hi da ki nongrep.
Lyngba ka jingplie lad daka Ministry of Food Processing Industries ka sorkar pdeng ha u snem 2017, World Food India Program ka iarap ban kyntiew iaki mar rep jong ki nongrep ban ioh jingithuh sha kiwei ki Ri bad kane ka Program kadei ruh ban kyntiew iaka rukom die, rukom song iaki mar rep jong ki nongrep ka Ri.
