Kohima, Naiwieng 03: Ka President Droupadi Murmu hynnin ka sngi Balang kala kala plie ia ki 75 tylli ki projek lyngba ka kor internet ha ka jingialang ba la khot pynlong da ka sorkar Nagaland shibynta ban pdiang burom ia ka jingwan jngoh ba arsngi ka jong ka sha kane ka jylla.
Haba aijingkren ha ka jingialang kaba heh, ka Murmu kala ong; “Nga la ioh jingtip ba ka jingdon jong kiba la nang la stad hapdeng ki kynthei ha Nagaland ka dei kaba heh tam hapoh ka ri, bad kane ka jylla ka dei ruh kaba shngain tam na ka bynta ki kynthei hapoh ka ri.Kane ka pyni ia ka jingburom ia ki kynthei hapoh ka imlang ka sahlang jong ki jaidbynriew Naga.”
Da kaba ai khublei kyrpang ia ka Phangnon Konyak kaba la kylla long ka kynthei kaba nyngkong na ka jylla Nagaland ka ban long ka MP ka Rajya Sabha, ka president Murmu ka kyntu ia ki kynthei jong kane ka jylla ba kin wan shakhmat bad ban iashim bynta shuh shuh ha ki kam paidbah. “Lada ki kynthei ki shah pynkup bor, kane kan wanrah shuh shuh ia ka roi ka par hapoh ka imlang ka sahlang,” ong shuh shuh ka president.
Kiba bun na kine ki 75 tylli ki projek ba la plie lyngba ka kor internet ki kynthup ia ki skul, katba kiwei pat ki hotel, surok, jingkieng bad ruh ka treasury building.Nalor kata ka Murkur kala plie ruh ia ka smart classrooms ha ki 190 ki skul sorkar kiba don ha kane ka jylla.
“Nga kyrmen skhem ba kine ki projek kin nangkyntiew shuh shuh ha kaba iadei bad ka jingnang jingstad, kan pynsuk ia ka rukom im, kan kyntiew ia ki kam jngohkai pyrthei bad ia ka ioh ka kot ka jylla,” ong shuh shuh ka Murmu.
Nalor kata kala ai ruh ka jingkhublei ia u Lat ka jylla u Jagdish Mukhi kumjuh ia u Myntri Rangbah (CM) u Neiphui Rio bad ka sorkar jong u halor ka jingseisoh ha kaba pyntreikam ia kine ki projek.
