Shillong, Naiwieng 15: U Myntri ka Pule Puthi u Bah Lahkmen Rymbui ula ong ba kadei ka jingjop kaba khraw iaka tnad pule puthi ka jylla ba ka lah ban pynkiew haduh 3 ne 4 shah iaka bai pule ne Scholarship jong ki khynnah bad samla pule ka jylla.
“Kawei na ki jingjop jong ka tnad pule puthi kadei ka jingpynkiew iaka Scholarship ha kane ka kynti kaba mynta, haba phi peit naduh mynshwa iaka Scholarship jong ki khynnah ki ioh naduh T.2000 haduh T.10,000 haka Post Matric hynrei ngi la shim iaka rai ha u 2019 ba iaka jingai iaka Scholarship kaba duna eh kadei ban long T.5000 haduh T.45,000” ong u Bah Lahkmen Rymbui.
“Kane ka jingpynkiew iaka Scholarship kala iarap bha ia u duk u suk ba un ioh ban siew iaka bai skul” ong u Myntri ka pule puthi.
Une u Myntri Sorkar ula pynpaw ka jingsngewnguh iaka sorkar jylla kaba la pdiang ban pynkiew iaka Scholarship haduh 3 ne 4 shah na kaba ki ju ioh mynshwa.
“Na ka bynta ka Pre Matric ngi lah dep ban pyllait iaka Scholarship haka 10 tarik u Naiwieng sha ki 72 ngut ha ka jinglut kaba kot T.2 Lak tam bad ha ka 11 tarik la pyllait iaka Scholarship sha ki 2446 ngut ki khynnah pule kaba kot T.75,79,950 Lak hynrei ki don 155 ngut ki bym pat ioh iaka Scholarship” ong u Bah Rymbui.
U la ong, ki khynnah ki bym pat ioh iaka Scholarship ka lah ban dei na ka daw ka jingbym biang ka Bank Account ka jongki ne na kiwei pat ki daw hynrei ka sorkar ka dang shimkhia bad ka National Portal khnang ba kitei ki khynnah kin ioh noh iaka Scholarship.
“Ha ka Post Matric Scholarship kiba dei ban ioh iaka Scholarship ki long 58443 ngut hynrei haduh ka 14 tarik u Naiwieng kiba la ioh iaka Scholarship ki long 54,730 ngut ha ka jinglut kaba kot T.99,65,13, 651 Klur bad kiba sah ban ioh iaka Scholarship ki long sa 3713 ngut bad kine ruh kilah ban dei namar ka jingbym biang ka Bank Account ne kiwei pat ki daw” ong u Bah Rymbui.
Ula ong, ka sorkar ka dang ialeh ban shimkhia ia kane bad ka PMFS bad NSP khnang ba kine ki samla pule kin ioh noh iaka Scholarship ka jong ki.
U Bah Rymbui u la ong, ka sorkar mar ia ioh iaka pisa naka sorkar pdeng kala shimkhia ban pyllait noh mardor iaka pisa shaki khynnah bad samla pule bad ka jingsiew iaka Scholarship baroh jong ki khynnah kala kot sha ka T.196 Klur tam.
