Ka jingpyniasoh NPP u Dr Bom ka dei ka rai shimet | Pynshai ka UBCC sha ki paidbah

Nongpoh, Nailar 21 : Ka Umsning Block Congress Committee (UBCC) hynne ka sngi Balang, kala pynshai sha ki nongtrei bad nongkyrshan ka Congress, ba ka jingleit pyniasoh jong u MLA Dr Celestine Lyngdoh (Dr Bom) sha ka National People’s Party (NPP) ka dei ka rai shimet jong u ym kaba iamynjur lang kum ka Block.

Kane ka jingpynshai kala mih ha ka jingialang jong ka Central Executive Committee (CEC) jong ka Umsning Block Congress Committee (UBCC), kaba long hynne ka sngi ha Umsning.
Haba kren sha ki lad pathai khubor, u President ka Block Rocky Marwein ula ong ba ia kane ka jingialang la lum ban ioh pynshai sha ki nongkitkam bad ki nongkyrshan jong ka Congress ha ki Unit bapher bapher halor ka jingphet noh jong u MLA sha ka NPP.

Ula ong ba ka rai jong u MLA ka dei ka rai ba shimet bad ka UBCC kam don bynta eiei ruh em ha kane ka kam ba kynthup ruh ia ki Youth Congress, ki Mahila Congress bad ki nongkitkam jong ki thain bapher bapher ka constituency.

U bah Rocky u pyntip ba ha ka jingialang jong ka CEC ba long ha ka 10 tarik Nailar, u MLA Dr Bomu la dep pynpaw ba un leit ban kyrshan noh ia ka Sorkar na ka bynta ban wanrah ia ka roi ka par hapoh ka constituency namar u sngew ba ka jingshongha ka Liang Pyrshah kam long kaba suk ia u ban pyndap pynbiang ia ka constituency bad ia ki paidbah kiba ju wan ban donkam shimet ha Ophis jong u.

“Watla u MLA ula leit ban iasoh sha ka NPP, ngim dei ban duh jingkyrmen ne rit mynsiem” ula ong haba kyntu ia ki nongkitkam bad ki nongkyrshan jong ka party kiba wan sha kane ka jingialang.

Ula ong ba ma u kum u President bad u Secretary nalor ki nongkitkam jong ki Unit bapher bapher kin dang iai neh hi bad ka Congress haba bynrap “Ka congress ka dang skhem, ka dang tylli bad kan iai ai ka jingshakri kaba janai ia u paidbah ka constituency”.