Shillong, Lber 15: Ka Myntri ka tnat ka koit ka khiah Kong Ampareen Lyngdoh hynne ka sngi Balang, kala pynthikna ba ka jingpang bampong ka dei ka nongpyniap briew ba shyrkhei eh hapoh ka Jylla.
I Kong Ampareen ila pynpaw ia kane hadien ka jingjurip iaka jaka sumar iaki ba pang bampong lane ka Cancer Wing jong ka Civil Hospital Shillong.
Ha kane ka jingleit jurip iaka Cancer Wing jong ka Civil Hospital Shillong, la synran iaka Dr. Ampareen Lyngdoh da ka Dr. Anisha Mawlong kaba dei ka Specialist, HOD Radiation Oncology Department bad u Dr. W.B Langstieh, HOD Pathology Department lem bad kiwei ki heh ophisar ka tnat ka koit ka khiah ka sorkar jylla.
Haba kren sha ki lad pathai khubor hadien ka jingialang bad ki doctor jong ka Cancer Wing bad ki doctor jong ka Civil Hospital Shillong, I kong Ampareen ila iathuh ba ka jingpang bampong (Cancer) kadei kawei na ki nongpyniap briew ba shyrkhei hapoh ka jylla Meghalaya.
I kong Ampareen ila ong ba kane ka jingwan jurip iaka Cancer Wing ka la plie ia ki khmat jong i bad kumjuh ruh ban sngewthuh haduh katno kane ka jaka sumar iaki ba pang bampong ka kot bor ban pynbit pynbiang iaki lad jingsumar.
Ila ong ba kum ka Myntri ka tnat ka koit ka khiah bad kumjuh ruh ki paidbah nongshong shnong ka jylla khamtam kiba napoh ka nongbah Shillong, ki don ka jingkylli lano ka Cancer Wing jong ka Civil Hospital Shillong kan plie bad haduh katno kane ka jaka sumar kan ai jingmyntoi iaki ba wan phah sumar.
“Naka bynta ban ratdyngkhong iaka jingpang bampong (Cancer) donkam ban ithuh shwa naduh ba sdang, mano kita kiba lah ban ioh ia kane ka jait jingpang namar donkam ban sumar ia kane ka jingpang naduh ki sngi ba u/ka briew ki ioh ia kane ka jingpang” la ong I kong Ampareen.
I kong Ampareen ila ong ba naka liang ka sorkar jylla khamtam ka tnat ka koit ka khiah ka la buh iaka thong lane kan pyntreikam daka ‘Mission Mode’ naka bynta ban ratdyngkhong ia kane ka jingpang daka ba pynbun bad pynkhlain iaki jaka eksamin lane ki ‘Screening Camps’ ha kylleng ka jylla Meghalaya.
Ila ong ba ka East Khasi Hills ka dei ka district kaba jur bha ka jingpang bampong bad dei namar kane, la sdang iaka ‘Mission Mode’ na Shillong bad haduh mynta palat 2 hajar ngut ki briew kiba la wan ban phah eksamin.
“Nalor ka jingpynbun iaki jaka eksamin lane ki ‘Screening Camps’ ha baroh kawei ka jylla, la donkam ruh ban ai jinghikai khamtam iaki khun samla khnang ba kin sngewthuh kumno ban leh ha kaban lait na kane ka jingpang bad kumjuh ruh kumno ban leh lada kila sngewthuh ba ki lah ban ioh ia kane ka jingpang” ila ong.
Nalor kane I Kong Ampareen ila iathuh ba ka Cancer Wing jong ka Civil Hospital Shillong kala pyntreikam bha iaka skhim MHIS naka bynta ban iarap iaki ba wan shim dawai ne phah sumar hapoh kane ka Hospital.
