Nongpoh, K’lyngkot 05 : Watla ka jingduk ka ban bad ki jingeh ki iai kynton hynrei ka jingim hok bad jingiaid ha ka lynti kaba dei ban bsa bad ban pynheh pynsan ia la ki khun ki kti, kala pynioh ia ka jingkyrkhu kum ka jingkyrkhu ba wan na sha lyndet ia kawei ka Longkmie kaba hap ri haduh 6 ngut ki Khun naduh ba khlad noh u Khlieh ka Iing.
Kane ka jingkyrkhu kala wan ha ka dur jong ka jingisynei lem jong kawei ka Sengbhalang na Ri-Bhoi-ka Ri-Bhoi Youth Welfare Organisation (RBYO), kaba la pynshna da ka Iing ba paka ka ban iada na u slap, ka sngi, ka lyer bad ka miet ia kane ka Longkmie bad ki Khun ki Kti jong ka.
Kane ka Longkmie ka dei ka Kong Bashisha Sohktung kaba shong ba sah ha ka shnong Mardon Nongbah kaba ju shong shu sah tang ha ka Iing tyrpait siej.
Kane ka Longkmie kala duh noh iala u Kurim uba la khlad na kane ka pyrthei bad ula ieh ha I ban ri ban sumar haduh 6 ngut ki Khun kynthup ia iwei iba dang 2 snem duna.
Kane ka Longkmie ka hap ieh ia ine I Khunlung ha ka jingri jingsumar I Hynmen ba dang hapoh 9 snem namar ialade I hap ban mih leit bylla ban ioh bam.
Kine ki khun kim shem la iohlad iwei ruh ban leit school namar ka jingbymkot bor ban phah school bad ka khun heh kynthei ba dang hapoh 14 snem ka rta, ka la hap ban tynrong lem ia ka jingkit ka Kmie da kaba leit shong bylla iing briew sha sor tang ban lah pyndap bam bad kiwei ki jingdonkam ha iing.
Ka seng RBYWO haba iohi ia kane ka jingim ba kordit jong kane ka Longkmie, kala pynshna ia ka Iing paka da ka jingiasyn niang pisa ia ka jinglut jingsep hapdeng ki Nongialam bad ki Dkhot.
Kane ka Seng hynne ka sngi Palei, kala plie bad aiti ia kane ka IIng sha ka kong Bashisha Sohktung hadien bala pyndep nadong hadong. Ia kane ka iing la plie da u President ka Seng Bah Ban Kharnaior ha ka jingiadonlang u Vice President Elvis Kyrsian, Secretary Kenny Nongrum bad kiwei kiwei.
Shuwa ka jingialang plie bad aiti ia ka Iing, kala don ruh ka jingduwai kyrpang na I Tbn Krass Maring, uba la kyrkhu kyrdoh ia ka Iing, ka Longiing Longsem bad kumjuh ruh ia ki kam ba bha jong kane ka Seng.
, kaba la pynshna da ka Iing ba paka ka ban iada na u slap, ka sngi, ka lyer bad ka miet ia kane ka Longkmie bad ki Khun ki Kti jong ka.){kind=link}