Ka jingkynnoh jyrsieh khaii khaw ka dei ka bym don nongrim, lap ka Jingtohkit

Shillong, Jylliew 07 : Ka Independent Inquiry (jingtohkit ba laitluid) bala thung ban tohkit ia ka jingkynnoh halor ka jingdon ka jyrsieh khaii khaw na Jylla, kala shem ba ka jingkynnoh ka dei ka bym don nongrim satia.

Kane ka jingkynnoh ka dei kaba mih hadien ka jingioh kurup ki Pulit ka Assam haduh 100 byrni u khaw jong ka Tnad ICDS ba wan pynhap ha kawei ka godown ha Assam.

Haba pyntip ia kane hynne ka sngi Balang, u Myntri ka Tnad Social Welfare Bah Paul Lyngdoh ula ong ba ka Sorkar kala ioh pdiang ia ka kaiphod jong ka jingtohkit.

“Kat kum ka kaiphod baroh ki jingkynnoh halor ka jyrsieh khaii khaw ka dei ka bym don nongrim bad kam don satia ka jingshisha hangno hangno ruh halor kine ki jingkynnoh” ong u Bah Paul bad bynrap “kane ka dei ruh ka jingpynsngew bala buh hakhmat u Advocate General (AG) ka Jylla bad u AG ula kren shai ha ka jingsngew jong u ba ki kynnoh kim don kjat ban ieng bad namar kata, ym lah ban khein ia kane ka kam kum ka jyrsieh”.

U Bah Paul ula ong “Hadien bala ioh ia ki jingai jingmut na ka Tnad Ain bad u AG bad haba shem ruh ba kane ka jingjia bad ka case kala shimpor bha namar ka jingbym don ka jingiatreilang bad ki pulit Assam, nga sngew ba hadien habud ka dei ban don noh da ka por ban tohkit khnang ba ki mamla kiba shah kynnoh leh ia kine ki kam jyrsieh bad ka Tnad kin nym shu ngat ei ha ki jingshah kynnoh thala”.

Haba kylli kumno kine ki byrni khaw ki poi ha godown ka Assam, u Bah Paul ula ong ‘Na ki file noting, ka dei tang ka kam jong ka jaka ba jia ia kaba la buh jingthoh bha bad kumta, ia kane ka case la aiti sha ki Pulit ka Assam bad ha ka jingtohkit bha bad haba pynshong nongrim ia ka kaiphod jingtohkit, ka file kala iaid sha ka Tnad Ain bad sha u Advocate General ha kaba kila shai kdar ba kam don satia kata ka kam jyrsieh ba kan jia”.