Shillong, Nailar 18 : Hato phi tip ba ka jingtyrwa ban wanrah ia ka ropeway ban pynduna ia ka jingdheng kali ha Nongbah Shillong, ka dei kaba la mih naduh 28 snem mynshuwa.
Ym tang katta hynrei kane ka jingtyrwa ka long ruh ban pyniasoh ia ki shnong kiba jngai bad ki bym lah ban poi ne kiba don ha shiteng riat, ka jylla Meghalaya da ki ropeway.
Kane ka dei ka jingïohi jngai bad jingïohi shai jong u Salseng C. Marak, Myntri Rangbah barim ka Jylla Meghalaya uba la khlad noh ha ka 16 tarik u August, hynrei ki jingnoh synñiang jong u ki paw shai tang mynta katba ki jingsngewlem ki nang tuid.
La tep don burom ïa u sha ka jingjahthait bym jukut “kum u briew uba bha” ha ka sngi Saitjain, ha u lum jingtep Gajingpara ha Resubelpara, North Garo Hills district, hadien ba la pynlong ia ka jingleh burom khatduh ka Jylla ha madan ialehkai ha Resubelpara.
Katba ka Meghalaya State Planning Board ka dang sngewsih halor ka jingkhlad noh jong u Slaseng, ka la pynkynmaw pat ïa ki jingnoh synñiang ad ki matto kiba bun jong u Salseng kum u Myntri Rangbah ka Jylla naduh u snem 1993 haduh 1998 bad kum u chairman jong ka State Planning Board naduh u snem 2013 haduh 2018.
“Kum u nongialam uba don ka jingiohi jngai, u Salseng u dei u briew uba jemnud, u dei u mawlynnai ba kordor ” ong u John F Kharshiing, u Co-Chairman ka Meghalaya State Planning Board ha ka kyrwoh khubor.
U la pynkynmaw ba ha ka por ba u Marak u dang long Myntri Rangbah ha u snem 1993 bad 1998, u la shim ia ka bynta kaba kongsan bha ha kaba pynwandur ia ka Riti treikam bad ka jingpynbna ia ka Meghalaya Economic Development Council (MEDC), kaba kynthup ia ki nongmihkhmat na baroh ki seng sain pyrthei.
“Ka jingïohi lypa jong u ka la pynlong ïa ka jingïadon bynta bad ka jingwan jngoh jong ki riewshemphang na Swiss/Austria, kiba la ai jingmut ban buh ïa ki lynti nar (Ropeway) ban pynduna ïa ka jingkhapngiah ha ka leit ka wan ha sor bad ban pynïasoh ruh ïa ki shnong ki thaw jong ka Meghalaya kiba ym lah ban poi— ka jingmut kaba la tyrwa la jan 28 snem mynshwa,” pynpaw u Bah John.
Ha ka por ba u (Salseng) bat kum u Chairman jong ka Meghalaya State Planning Board naduh u bnai Risaw 2013 haduh u Jymmang 2018, ka Planning Board ka la sdang shibun ki jingjurip ha kiba bun ki district jong ka jylla bad ka la pynlong ia ki jingialang bishar bniah kiba bun bha bad ki tnad bapher bapher bad ka la air uh shibun ki jingai jingmut sha ka Sorkar Jylla ba kan ai jingmynjur.
“Dei ha kane ka por ba la lum ïa ka thup jong ki surok ba kongsan eh ha ka jylla bad la ai jingmut ban bishar bniah. Dei ha ka por jong u (Salseng) ba la aiti ïa ki Dkhot bapher bapher jong ka Board ha ki bynta ba kyrpang ba kin bishar bniah bad ban aiti ïa ki jingshem bad ki jingai jingmut jong ki,” pyntip u Bah John.
U la ong shuh shuh ba ka jingkynmaw ia u Marak kan ym long tang namar ka jinglong nongialam kaba don ka jingthmu hynrei ka jinglong uwei na ki khyndiat ngut ki Myntri Rangbah uba la shakri ia ka samoi ba pura, ka jingjop kaba duna bha ha katei ka por bad ban wanrah ia ka jingskhem ka synshar khadar ha ka jylla.
“Ki jingnoh synniang jong u sha ka jylla bad ka jinglong jemnud jong u ka la iehnoh ia ka dak kaba ym lah ban pyndam ha baroh kiba la ioh ia ka kabu ban ithuh ia u. Ka jingsngewlem ka leit sha kiba haïing hasem bad kiba ieid jong u ha kum kane ka por kaba eh,” u la pynkut.
 ban pynduna ïa ka jingkhapngiah ha ka leit ka wan ha sor bad ban pynïasoh ruh ïa ki shnong ki thaw jong ka Meghalaya kiba ym lah ban poi— ka jingmut kaba la tyrwa la jan 28 snem mynshwa,” pynpaw u Bah John.){kind=link}