Shillong, Naiwieng 17 : U Myntri Rangbah Duh ka Ri Conrad K Sangma ha ka sngi Thohdieng, ula pyllait paidbah ia ka roadmap kaba bniah na ka bynta ki kam pynroi ha Meghalaya, haba pynleit jingmut sha ka jingpynkupbor ia ki samla, pynriewspah ia ka kolshor bad kyntiew ia ka ioh ka kot ka Jylla.
Haba ban jur ia ka jingdonkam ban sei ia ka sap jong ki samla, u Myntri Rangbah ula kren halor ki buit ba bun jait bun rukom ki ban treikam ha ka liang ka kam shna phlim, ka put ka tem, ki kam sawari bad ka sengkam sengjam lajong.
Haba pynleit jingmut sha ki samla ka Jylla, ula ong “Nga kwah ia ki samla jong ngi ba kim dei tang ban shu phohsniew hynrei ban thaw buit bad long ki nongialam lynti. Ka jingkiew shaphrang ka Meghalaya ka shong ha ka kti jong ki samla bad ryngkat lang, ngin iatei ia ka Jylla ka ban long da ki jinglah treikam, ka jinglong kyrpang halade bad kaba neh”.
U Myntri Rangbah ula ong ruh ba ki samla donsap ki dei ban pyrshang ha kaban wanrah ia ki project kiba kham pher naba ka Sorkar ruh ka phaikhmat ban pynwandur ia ka film policy ban lah pynkha ia ka karkhana shna phlim hapoh ka Jylla.
Ula ong ba ki sienjam kum ka Meghalaya Grassroot Music Festival ka dei kaba thmu ban ai ka rynsan ka ban pyni sha ka pyrthei ia ka jingriewspah ka kolshor ka Jylla.
Haba kren halor ka jingjop jongka Lakadong Turmeric Mission, u Myntri Rangbah ula kren halor ki buit treikam ban kyntiew ia ka rep ka riang.
U Myntri Rangbah ula kren ruh halor ka CM-Elevate Programme kaba buh thong ban iarap pynurlong ia ka jingphohsniew ki palat 20000 ngut ki nongsengkam hapoh ka Jylla.
U Myntri Rangbah ula kren ruh halor ka jingkongsan ka jingtreikam hapdeng ka thain Shatei Lam Mihngi ka Ri India bad ki ri ka South East Asia da kaba shim nuksa n aka Vietnam.
Haba iohi ia ka jingkyrshan na ka Sorkar India, ula kren halor ka jingpynkhreh ka Jylla ban pynkhlain ia ki lad pyniasoh kiba dei na suin bad na ryngkew, na ki wah nalor kiwei kiwei.
U Myntri Rangbah ula pyntip ruh ia ka jingiakren kaba dang iaid shaid shaid bad u Myntri Rangbah Duh ka Ri Narendra Modi ban kyntiew shajrong ia ka Meghalaya Music ha ki rynsan ka pyrthei.
