Shillong, Nailar 28 : U Myntri kam Jngohkai ka Jylla Bah Paul Lyngdoh ha ka sngi Palei, ula maham halor ki jingshah ktah kylla ka Jylla lada pynjari ia ki kyndon ba pyrrkhing ia ka jingwan rung ki kali tourist ba nabar ka Jylla.
Ula pynpaw ba ki Jylla ba marjan ki lah ban pynphai markylliang da kaba pynjari ia kajuh ka jingpyr rkhing ia ki kali tourist na Meghalaya, ka ban sa ktah jur bha ia ki nongshongshnong ka Jylla.
Kane ka jingkynthoh kala mih kum ka jubab ia ka jingiakhih ba dang shen bala pynlong da ka All Khasi Meghalaya Tourist Taxi Association (AKMTA), ba dawa ia ka Sorkar ban pyrrkhing ia ki kali tourist ba nabar ka Jylla ba kin leit kamai sha ki jaka jngohkai.
“Hynrei ngi hap ruh ban khmih ia kiei ki jingktah kiba lah ban mih na ka jingpynphai markylliang. Kaei ka ban jia lada ki Jylla ba marjan ki pynjari lang ia ki kyndon ba pyrrkhong ia ka jingrung ki kali tourist ka Meghalaya sha Assam. Mano ban shah ktah ha kata ka por bad mano ban shim ia ka jingbahkhlieh? Hato ki taxi association kin shim ia ka jingkitkhlieh lada ki nong Meghalaya ki shah khang ban leit sha Airport ne Railway Station lane leit shah sumar ha ki hospital ha Guwahati?. Ngim kum ka Sorkar ngi hap ban leh ia kiei kiei da ka jingkitkhlieh” ong u Bah Paul haba iakren bad ki nong thoh khubor haba kyntu ia ki taxi association ba kin bteng ia ka jingiakren bad ka Committee kaba la khlieh da u Bah Cyril Diengdoh bad ban iapoi sha ka jingiasngewthuh jingmut.
Ula ong ba ka Committee, bala thaw da u Myntri Rangbah, kala dep pynlong la bun tylli ki jingiakren bad ki kynhun bapher bapher kynthup ki taxi association, ban wad ia ka jingpynbeit.
Haba niew ia kane ka kam kum kaba jyrwit jyrwat bha, u Bah Paul ula kular ba ka Sorkar kala kut jing mut ban pynthikna ba ki kam jngohkai kin ai jingmyntoi shibun eh ha ka iohkam iohkam ki trai shnong.
U Myntri u pyntip ba ka Sorkar kala pyntreikam ia ka PRIME vehicle scheme, kaba bei pisa haduh 80% ia ki tourism operator trai shnong ba kin thied ia ki kali kiba rem. Kane ka skhim ka thmu ban kyntiew ia ka jingiohkam iohjam ki trai shnong bad kan ai jingmyntoi na ka jingkiew ki kam jngohkai ha Jylla.
U Bah Paul ula pynbna ba ia ka portal jong kane ka skhim yn sa pyllait shen, da ka jingpynbun shuh shuh sa 100tylli ki kali PRIME.
Haba kylli halor ka jingshah kem ki dkhot ka HNYM ba kynnoh dawa pisa na ki kali Tourist ha Ri-Bhoi, u Myntri ula pynpaw ia ka jingsngewkhia bad ong “Ngim ju khmih lynti ba ki Sengbhalang kin leh kum ki riew bymman. Ka jinglute na ki passenger ka lah ban ai jingmyntoi ia uto u briew uba ioh 1000 tyngka ne tam hynrei khatduh u don ia ka iing ka sem, u don ia ki paralok, kiba bun kiba shaniah na ki kam jngohkai”.
“Kane ka dei ka kam kaba ngi hap shimkhia bha. Ngan sa rah iakren ia kane mar syn wan phai u Symbud Myntri Rangbah ba khmih ia ki kam Pohiing” ula kular.
