Nongpoh, Ïaïong 01: Ka United Democratic Party (UDP) Nongpoh Circle hynne ka sngi ai la pynkup burom ïa u Bah Mayralborn Syiem MLA ka Nongpoh Constituency, hadien ka jingjop don burom ban long kum u Nongmihkhmat sha ka iingdorbar thaw ain ka Jylla haka election kaba la dep.
Ha kane ka sngi la wan ban shakhi lang da ki nongkitkam ka seng UDP ba kynthup ïa u Bah Balajied Ranee, MDC ka Nongpoh Constituency, President UDP Ri Bhoi Bah Donbok Khymdeit, Bah Micheal Kharhunai Secretary UDP Ribhoi, U Bongkhai Ka Raid Umwang, Ki Dhot ka UDP Nongpoh Circle, Bah R.R Makdoh Nongïalam ba ratbah jong ka UDP Ribhoi, Ki Women’s Wings, Ki Dkhot ka Youth Wing, ki Dkhot jong ki Unit bapher bapher bad ki nongkyrshan ka Party UDP bad kiwei kiwei.
Haba kren paidbah, u bah Mayralborn Syiem, u la Pynpaw ka jingsngewnguh kaba kyrpang ia ka ki nongkitkam naduh ka Nongpoh Circle, Ki unit bapher bapher bad ïaka UDP Ri Bhoi kaba la kynmaw khnang ban pyndon burom ïa u ha kane ka sngi. U la pynpaw ruh ka sngewkmen ban ïohi ïaka jingai mynsiem jong ki nongkyrshan kiba ki la shaniah bad ibit ia u ban long biang u MLA jong ka Nongpoh Constituency.
“Ka bor ka wan ruh ka jingkitkhlieh kaba khia. Ka seng UDP ha Jylla ka khmieh lynti bad angnud ba ki paidbah jong ka jylla kin ai ka jingkyrshan kaba pura iaka Party UDP ha jylla, halor ka jingthrang ban ïoh ïa u CM na Ri khasi”, ong u Bah Syiem da kaba bynrap ruh ba ki nongïalam ka UDP ki la leit ban tyrwa ia ki 45 ngut ki kyrtong ha khmat ki paidbah ba kin ai ka jingkyrshan ban pynurlong ïaka jingthrang ka Seng, hynrei ka mon hi ka shong ha ki paidbah ïano ki ibit ban jied.
U la ong ruh, Ka jingleit jong ka Party UDP ban ïasoh bad ka sorkar MDA ban thaw sorkar ka long ba hadien ka jin gpyrkhat sani bha halor ka jingmyntoi jong u paidbah ba bun balang bad daka jingïa sngewthuh jingmut lang ki 11 ngut ki MLA ka UDP ha ryngkat ki nongialam ka party, ka la pynlong iaka party ban leit synrop lang bad ka sorkar MDA.
Ha kane ka sngi kum, ka UDP Nongpoh circle ka la pynkup burom ïaki nongrwai kiba la rwai naka bynta u kyrtong jong ka UDP bad ki la pynbna ruh ïaki nongjop naka bynta ki polling station ki ba bun vote lyngba ki percentage.
Ka Polling Station Jermanai ka la wan nyngkong, ka Umsaw Nongbri ba-ar bad ka Mawryngkang kala wan ba lai bad la pynbna ruh ia ki polling station kiba heh kiba ïoh ban wan shakhmat haka jingïoh bun tylli ki vote hakaba ka Shnong Pahamsyiem ka la wan Nyngkong, ka Umsaw Nongbri baar bad ka Polling station Diwon ka la wan balai bad naka liang u MLA u la pynbna ba un sa leit sha kitei ki Polling Station ban ai ïaki khusnam.
