Imphal, Nailur 05 :U Myntri Rangbah (CM) ka Manipur, u Biren Singh ula kam ba ka jingieit bad ka jingsngewtynnad ia ka seng BJP kala nangjur ha kane ka thain shatei lammihngi (Northeast) jong ka ri.
“Ka jingieit bad ka jingsngewtynnad kala nangjur katba nang mih ki sngi hapoh ka thain Northeast,” ong u CM ka Manipur, u Biren Singh hynnin ka sngi U Blei.Kane ka jingkren jong u CM kala wan long ruh hadien ka jingwan pyniasoh ki san ngut ki MLA ka JD-U sha ka BJP ha ka jylla.
“Ki rukom treikam jong ka seng BJP ki kham khraw 100 shah haba ia nujor bad ki rukom treikam jong ka JD-U,” ong u Biren Singh. “Yn tang ki MLA, hynrei ki nongtrei ka JD-U ruh kila wan pyniasoh sha ka BJP. Nga pdiang sngewbha ia baroh,” ula ong shuh shuh.
Lah ban kdew ba san napdeng ki hynriew ngut ki MLA ka JD-U ha Manipur kila leit ban pyniasoh noh ialade bad ka party synshar ka BJP ha kane ka sngi Thohdieng ba la lah.
Kine ki MLA ka JD-U kiba la leit ban pyniasoh bad ka BJP ki kynthup ia u K Joykishan, N Sanate, Md Achab Uddin, LM Khaute bad u T Arunkumar.
Ka jingthoh ba la soi sa u secretary assembly ka Manipur, u K Meghajit Singh kala ong ba u Lamphang ka iingdorbar ula pdiang sngewbha ia kane ka jingwan pyniasoh jong kine ki san ngut ki MLA ka JD-U sha ka BJP.
Kane ka sienjam ba la shim da kine ki MLA ka JD-U kala wan long ruh khyndiat taiew hadien ba u Nitish Kumar ula iehnoh ia ka BJP bad pyniasoh bad ka RJD, Congress lem bad kiwei pat ki party, kata da kaba iehnoh ia ka BJP na ka sorkar hapoh Bihar.
Hynnin ka sngi, kitei ki san ngut ki MLA ka JD-U kiba la leit pyniasoh sha ka BJP kila iakynduh ruh ia u national president ka BJP, u JP Nadda ha ka nongbah New Delhi.
