Agartala, Risaw 12 : U president ka BJP ha Tripura u Rajib Bhattacharjee hynnin ka sngi ba Ar ula ong ba ia ka rai ba khatduh la kane ka party kan dang bteng ne em ia ka jingiateh bad ka paralok synrop ba mynta jong ka, ka IPFT yn sa shim da ki nongialam ba hakhliehduh jong ka party.
Hynrei watla katta u Bhattacharjee ula iai ban ba ka BJP kan iai pynneh ia ka burom na ka bynta ki paralok synrop.
“Ia mynta hi kaba Nga lah ban ong ba ka BJP ka don ia ka rekod kaba khuid ha kaba iadei bad ka jingburom ia ki paralok synrop, kata la ka long naduh ki Village Committee election.Halor ka jingpynneh ne pynkut noh ia ka jingiateh na ka bynta kane ka ilekshon assembly ka ban wan kane kan shong eh ha ki nongialam ba hakhliehduh ka party.Hynrei, kaei kaba Nga lah ban ong ka long ba ka BJP ka don ia ka tynrai jong ka jingburom ia ki paralok synrop bad ia ki briew kiba don hapoh ki party synrop,” ong u Bhattacharjee.
Nalor kata une u president uba dang shu shah jied shen jong ka party ha Tripura ula pynthikna ruh ba ka party jong u kalong kaba la kloi ban leit sha ka ilekshon. “Ka BJP ka treikam ha ka rukom kaba iaid beit iaid ryntih bad man la ki nongtrei ka party ki tip iala ki jong ki bynta hapoh ka party.Ngi la iai long kiba la khreh ban pynpaw ia ka jingkhlain jong ka party bad ka nuksa kaba biang eh ka long lyngba ki jingmih hadien jong ka ilekshon,” ong u president.
Ha kaba iadei bad ka jingthaw ia ka committee bathymmai kaba iadei bad ka jingpynkhreh ia ka ilekshon ka ban wan, une u president ula ong ba kine ki dei ki jingtrei kiba iai bteng da ka party.Kumta ruh ula ong ba la thaw biang ia ka committee sa shisien pat na ka bynta ka ilekshon assembly ka ban wan khnang ba kin lah ban pyniaid beit ia baroh ki jingtreikam kiba iadei bad kane ka ilekshon.
U Bhattacharjee ula ong ruh ba na ka liang ka seng BJP ha ka jylla kan pynlong ka jingpdiang sngewbha ia ka president ka ri ka Droupadi Murmu.
“Ka President Droupadi Murmu kan pynlong ia ka jingwan jurip ba ar sngi sha kane ka jylla bad ki jingpynkhreh kila jan dep.Kane ka dei ruh ka kynthei riewlum kaba nyngkong ka ban poi ha ka kyrdan kaba hakhliehduh hapoh ka ri, bad kumta ngi ruh ngi long kiba la kloi ban pdiang sngewbha ia ka president,” ula ong shuh shuh.
