Shillong, Rymphang 20 : U MLA ka VPP na North Shillong Bah Adelbert Nongrum, ula ai burom khatduh ia u MP ka Shillong Dr Ricky AJ Syngkon, uba la khlad kyndit kyndit ha ka miet sngi Palei ha Robert Hospital, Jaiaw.
Haba ai jingkren sngewlem ha Iingdorbar Thaw Ain ha ka sngi Thohdieng, u Bah Adelbert ula ong ba u Dr Syngkon u dei u “u briew uba aiti lut bad uba don ka jinglong ba lah ban khring ia kiwei” bad u riew sain pyrthei ba sngewrit.
“Ka jingkhlad noh jong u ka dei ka jingduh kaba khraw ym tang ia ka Iing hynrei ia ka Party bad ka Jylla baroh kawei” ong u Bah Adelbert.
Une u MLA ka VPP ula ai khublei ia ka Sorkar namar ka jingpyni ia ka jingiadon ryngkat bad ong “Nga ai khublei ia ka Sorkar lyngba u Myntri Rangbah, Symbud Myntri Rangbah bad ki bor Sorkar kiba la leit sha Robert Hospital ban pyni ia ka jingiadon ryngkat ha ka por ba sngewsih”.
Ula pynpaw ia ka jingkyrmen ba ka jingkhlad u Dr Syngkon kan wanrah ia ka jingkylla ha ka rukom pyrkhat pyrdain ha ka sain pyrthei. “Nga ngeit skhem ba ka jingkhlad jong u kan wanrah ia ka jingkylla ha ka rukom pyrkhat pyrdain ha ka sain pyrthei khnang ba ngin lah pynthikna ia ka jingkylla ba shisha ha ka Jylla baieid jong ngi”.
Katba u President ka VPP bad MLA ka Nongkrem Bah Ardent M Basaiawmoit bad ki arngut kiwei pat ki MLA ka party-Bah Brightstarwell Marbaniang bad Bah Heavingstone Kharpran ki khlem poi satia sha ka Iingdorbar. Hadien, u Bah Ardent, uba la bunkam ha ka jingpynkhreh ia ka sngi ontep, ula pynshai ba u dang mut ba la pynkynriah ia ka Dorbar haba shim ia ka rai jong ka Sorkar hynnin ka sngi.
U Bah Adelbert ula phah ia ka khubor sngewlem sha ki bahaiing hasem bad ong “Ai ba u Blei ba donbor tam ba un kyrkhu ia ka mynsiem bad duwai ba u Blei un siew kylliang ia ka mynsiem bala khlad noh ha Bneng”.
