Ki Nongjngohkai kim dei ban bishar ia ka Shillong tang da kawei ka jingjia
Shillong, Nailar 23 : U Deputy Commissioner ka East Khasi Hills Abhilash Baranwal ha ka sngi U Blei ula ong ba ki jingbuh ia ka bor pahara kaba khlain ha kylleng ka sor Shillong kan dang iai bteng katba ki nongshongshnong kim pat sngew shngain namar ka jingjia kam thombor ha ka 19 tarik Nailar.
“Ta ka daw phi iohi ia kine ki jingiaid pahara baroh bad ka jingdon bun ki bor pahara ha kylleng ka Sor bad ngin dang bteng ia kane tad haduh ba ki nongshongshnong ka Shillong ki sngew sngain” ong u Baranwal.
Ha kajuh ka por, ula kyntu ia ki nongwan jngohkai ba kim dei ban bishar ia ka sor tan gna kawei ka jingjia ba jia ryngkhat, hadien ka jingioh khubor ba kila pynsangeh noh ban wan sha Shillong.
“Nga la ioh pdiang ia bun ki khubor na kylleng ka Ri ha kaba kila ong ba kim kwah shuh ban wan sha Shillong. Tang kawei ka khubor ba nga ai ha ki ka long ba sngewbha ban wan sha Shillong, ka dei kaba shngain, wat ym bishar ia ka sor tang na kawei ka jingjia ba shu jia ryngkhat” ula ong.
“Ki paidbah ka Shillong bad East Khasi Hills ki pdiang ia ki bad ki dei kiba pdiang sngewbha kum ki nongjngohkai bad ka Shillong ka dei ka jaka wan jngohkai kaba kongsan ha kylleng ka Ri bad ka pyrthei. Ngi kwah ia ki ban wan hangne bad ngi kwah ban pdiang ruh ia ki” ula bynrap.
U Deputy Commissioner ula kular ba ki bor district kin aiti lut ha kaban pynthikna ia ka jingshngain jong ki nongwan jngohkai.
