Itanagar, Nohprah 07 :Naduh kine ki khyndiat por ba la dep na ka liang ka New Delhi ka la pynpaw ka jingsngewkhia kaba jur ha kaba iadei bad ka jingsdang phaikhmat biang jong ka China sha ki bynta jong ka Arunachal Pradesh. Ka South Tibet ka dei ka kyntien ba la pyndonkam da ka China ban kdew ha kaba iadei bad kumba 90,000 square km ki bynta jong ka India ia kaba kala kam kum ki jaka puta ki jong ka.
Katkum ka Simla Convention, ba la ia soi ha ka snem 1914 da ka Britain, China, bad ka Tibet, ka Chinese Republic kala iai pynksan lyngba ka histori halor ka jinglong trai ia ki bynta khappud jong u McMahon Line kaba pyniaphiah ia ka British India na ka Tibet.
Ia ki bynta khappud hapdeng ka thain mihngi ka Bhutan bad ka Isu Razi pass ha khappud ka China-Myanmar la tip kum u McMahon Line, kata hadien ka kyrteng jong u Henry McMahon uba la shim ia ka bynta kum u nongiakren ba hakhiehduh ha katei ka Simla Convention.
Hapoh Arunachal Pradesh, shathie jong u McMahon Line, na ka liang ka China kala iai pynksan bad kam ba ki dei ki bynta u pud u sam u jong ka.Ki jingpynksan bad ki jingleit jurip da ki heh sorkar shapoh Arunachal Pradesh ki dei kiba la leh shibynta jong ka jingpyrshang ban pynpaw halor ka jinglong trai.
Na ka liang ka sorkar Beijing kala sdang ruh ban jer kyrteng thymmai ia ki jaka puta jong ka Arunachal Pradesh, kata katkum ki kyndon bad ki kyrteng ba la pynmih da ka Chinese State Council .
Ha u bnai Nohprah 2021, ka Ministry of Civil Affairs ka China ka la pynbna ba kala pynkylla kyrteng ia ki 15 tylli ki jaka hapoh Arunachal Pradesh.
Watla katta ia kiba kum kine ki jingpyrshang ka China kala leh ruh ha ki por kiba la leit noh.Shwa ka jingwan jngoh jong u Dalai lama ia ka jylla Arunachal Pradesh ha ka snem 2017, bad shibynta jong ka jingpynpaw pyrshah ia ka jingwan rung jong une u nongialam niam ka Tibet sha katei ka jaka, na ka liang ka China kala pynkylla kyrteng ia ki katto katne ki jaka ba kongsan.
Na ka liang ka China dang shen kala pynkylla kyrteng ruh ia ki phra tylli ki jaka shong shnong, sawtylli ki jaka lum, ar tylli ki wah bad kawei ka jaka halor jong ka wah hapoh Arunachal Pradesh.
Kane ka jingsdang jong ka China ban phaikhmat bad shim khia biang ha kaba iadei bad kitei ki jaka hapoh Arunachal kala wan long ruh hadien ba ka jingiadei hapdeng ka Beijing bad ka New Delhi kala kham hiar arsut hadien ki jingiakynad kiba la jia dang shen ha ki jaka khappud.
