Shillong Nailur 09: Ka Jaintia Coordination Committee on Reservation Policy (JCCRP) hynne ka sngi Siatjaiñ kala pynlong iaka Dorbar ki khun ka Ri Jaintia ha Ladthlaboh, Jowai ban iatai bad phylliew jingmut ha kaba iadei bad ka Reservation Policy jong ka jylla.
Ha kane jingialang la wan iashimbynta da ki riew rangbah bad ki riew shemphang ka ri Jaintia kiba kynthup ia u Prof.P M Passah, u nongiasaid aiñ Bah Erwin Sutnga, u President barim ka JSU Bah Garlan Rymbai, u Bah D.Pde na ka Synjuk ki Waheh Chnong Jowai bad la don lang ki nongialam ka seng JSU,JSM,JYF bad JNC bad kiwei kiwei.
U Chairman ka JCCRP u samla Jersom Shylla ula pyniaid ia ka jingialang bad la ioh iaka jingkren na ki riew paidbah bad na ki nongialam seng kiba kynthup ia u Jimmy Kharmuti uba long u Working President ka JSM, u samla O Tariang, u President ka JYF, u samla T.R Suchen u General Secretary ka JSU bad u samla Sambormi Lyngdoh u Secretary ka JCCRP uba long ruh u President ka JNC.
Ka jingialang kala pynpaw ba ka sorkar jylla lyngba ka Expert Committee kam dei ban shimpor than eh haduh shi snem ban pyndep iaka kaiphod lane ban khmih bniah iaka Reservation Polcy hynrei kadei ban kham pynkloi namar ioh shu long tang ka buit ka sorkar ban pynslem kai iaka por ban khmih biang iaka Reservation Policy .
La shim ruh ia ka rai ban thung iaka Core Committe ban pynsngew sha ka sorkar lada donkam ban ai jingmut ha kaba iadei bad ka Reservation Policy, la pynkut ka kyrwoh na ka JCCRP.
