Agartala, Naitung 6: Ka jingialang ha ka miet sngi Saitjain kaba la long ha iing syiem Ujjayanta, hapdeng ki MP ka BJP bad u Myntri Rangbah barim u Biplab Kumar Deb ha ryngkat bad u khlieh duh jong ka Tipra Motha u Pradyot Kisho Debbarma kala mih ka jingkynthoh sain pyrthei ha kylleng ki jaka jong ka jylla Tripura.
Kane kala wan, tang hadien da ki kynta ba ki MLA jong ka Tipra Motha kila byrthen ban weng noh ia ka jingkyrshan na ka sorkar ba la ialam da ka BJP tang namar ka jingbym lah ban pynurlong ia ki jingdawa jong ka Tiprasa Accord bad ka jingsngewkhia ia ka jingioh lad ban rung tuh shapoh ka jylla.
Ki ar ngut ki nongialam kila kyntait bad pynpaw ba ka jingiakynduh kadei tang ka “jingleit jngoh burom” ban kitbok kitrwiang ïa u Pradyot ïa ka sngi kha kaba la tam sngi ne (belated birthday) — kaba la hap ha ka sngi Palei — hynrei ka por bad ka jinglang sop sop (close door) hadien ba mih ka jingbym hun kaba la mih hapdeng ki ar seng.
Katkum ka tyllong khubor, kane ka jingialang ba sop sop kaba la long ha iing syiem kala neh kumba shi kynta. Kaba khlem pyllait eiei ia ka jingtip ba bniah ne tikna, hynrei ki briew kiba don shapoh kila pynpaw ba kane kan kham palat ban ia kaba wan ai khublei sngikha.
Haba kren sha ki lad pathai khubor, u Biplab Deb ula ong, “Ki phet wir Rohingya kin ym ioh jaka hapoh ka ri…..bad ka jingwan rung be-ain dei ban pynsangeh ne khanglad la ka long ha kano kano ka rukom ruh bad pynpaw ruh ba kila dep ban ia kren ia kane ka mat bad ka sorkar pdeng. Kum ka Gujarat bad kiwei ki jylla, ha kaba ka sorkar ka la leh tyngeh halor ka jingwan rung tuh, ngi ha Tripura ruh ngin leh ïa kane ka mat da kaba tyngeh bha”.
Haba iakren bad u Pradyot, ula iathuh ba ula ioh ban iakren bad u myntri rangbah u Dr Manik Saha bad na ka liang u “U myntri rangbah ula kular ha Nga ba un rah ia kane ka jingsngew jong ki paidbah trai ri ne ki riewlum bad un sa rah ia kane ka mat ban pynsngew ia ka jingeh ki TMP ha ki synsan kiba biang,”.
Haba jubab halor ka jingbyrngem u Ranjit Debbarma, u Pradyot ula batai ba ka mih na “ka jingsngewsih” bad “ka jingsngew ba shisha bad ka jingduh jingkyrmen bad jingbym shngaiñ” hapdeng ki jaidbynriew trai ri trai muluk ha ki bynta ba jngai ne ki thain nongkyndong.
