Shillong, Iaiong 19: Ka kyrtong ka NPP na Shillong parliamentary seat bad Myntri Sorkar Kong Ampareen Lyngdoh ha ka sngi Thohdieng kala ong ba ka jakhlia lane ka mynsiem isih briew bala wanrah da ka Liang Pyrshah Voice of the People Party (VPP) ha ka jylli sain pyrthei ha Meghalaya ka dei kaba sngewsih jur.
Haba iakren bad ki lad pathai khubor hadien ba thep vote, ka kong Ampareen kala ong “Ngan nym ong ba ka elekshon ha Meghalaya kala shitrhem bha, ngan ong ba ki don ki nongialehkai ha ka jylli sain pyrthei kiba la pynlong jakhlia, bym don jingiaburom markylliang bad ka dei kane kawei ka party kaba la pynjew slem lut ia ka jingmut jingpyrkhat jong baroh, ta ka daw nga la kren ia ka jingbamklop ia ka jingmut jingpyrkhat. Kito ki sngi kila kut noh ha Jylla Meghalaya ha ka jingia burom markylliang jong baroh ki seng sain pyrthei”.
Ka kong Ampareen kala kynthoh ruh “Nga la don bynta ha ka sain hima sima naduh ba nga dang 8-9 snem, ngam pat ju iohi ia kum kane ka mynsiem isih briew, kane ka dei kaba ima bad kane hi kan sa pynjot ia ngi”.
Haba kylli, ka kong Ampareen kala ong “Kane ka dei ka sien ba nyngkong ba nga iakhun ia ka elekshon MP, Ngam ong ba nga sngewskhem hynrei nga ong ba ka kynhun jong nga kala trei shitom bha, ka party jong nga kala iatrei bha ha kane ka kynti bad baroh ki shipai kila don lut sha ki lyngkha treikam ban pan ia ka jingkyrshan u paidbah”.
Haba niew ia kane ka jingiaid lynti kaba sngewhun, ka kong Ampareen kala ong “Nga la shimkhia naduh ka mynsiem, nga la aiti lut kat kaba don, nga la ai kaba bha tam bad ka jingiaid lynti jong nga ha baroh 36 tylli ki constituency ka dei kaba sngew hun shisha. Nga kular ba ngan nang trei shitom ban pynthikna ban gin iatreilang ha baroh 36 tylli ki constituency ha kaban pynthikna ba ki paidbah kin ioh jingmyntoi”.
“Ngi don hangne ban shakri ia ki paidbah, ngim dei ban iapein bad nga la buh jingthoh ia baroh ki jingshem ha kane ka jingiaid lynti ioh ba nga klet bad ngan pynthikna ba ngan iasaid, iasyllok, ngan kren ia ki ishu kiba nga sngew ba ki donkam kyrkieh ban leh eiei da ka Sorkar” kala bynrao.
