Shillong, Risaw 23 : Ka jingpyntreikam ia ka Rain Museum ha Mawsynram kala iaid shakhmat bad u Contractor ula sdang ban pyntrei ia ki kam, pynbna u MLA ka UDP na Mawsynram Bah Olan Suin ha ka sngi Palei.
U Bah Suin ula pynpaw ia ka jingsngew skhem ba kane ka project kan dep hapoh ka 18 bnai, ha ka jinglut ba kot T.25 klur.
Ka Rain Museum, hadien bala dep pyntrei, la khmih lynti ba kan long kum ka jaka ai jingtip ia ki nong wan shangkai pyrthei kiba wan kai sha Mawsynram bad kan dei ruh ka jingtei kaba kham pher ka ban pyni ia ka kyrdan jong ka Constituency kum ka jaka ba jur slap tam ha ka pyrthei.
“Kan long kum ka kyrteng ban pynpaw ia ka Mawsynram constituency” ong u Bah Suin haba bynrap “Ka Rain Museum, kan ai ia ka dur thymmai ia ka Meghalaya”.
U Bah Suin ula kren ruh halor ka jingkongsan ban don ia ki surok kiba bha ban kyntiew ia ki kam jngohkai ha ka constituency.
Ula iathuh ba ka jingmang pisa ba dang shen ban shna ia ki surok kan iarap bha ban pynbha ia ka jinglong ki surok ha Mawsynram, ka ban nang pynaram ia ki nongjngohkai ba kin wankai.
“Kiei kiei baroh ki shong ha ka surok” ong u Bah Suin.
“Haba nga leit sha ka constituency jong nga, ka surok ka long kaba sniew bha bad hateng hateng phim sngew kwah satia ban leit. Hynrei, da ka jingioh ia ka mang tyngka dang shen, ki surok kin sa bha noh bad kane kan iarap shikatdei eh ban kyntiew ia ka kam jngohkai ha ka constituency”.
Kat kum ka jingong jong u, ka jingpyndep ia ka Rain Museum bad ka jingpynbha ia ki surok la khmih lynti ba kan pynwan dur thymmai ia ka Mawsynram constituency, bad pynlong iaka ba kan kham khring shuh shuh ia ki nongjngohkai.
U Bah Suin ula pynpaw ia ka jingsngewskhem ba kine ki project kin sa dep hapoh ka por bala buh bad kin wanrah ia ki jingkylla kiba itynnad hapoh ka constituency.
