Guwahati, Naiwieng 21 :Da kaba kynthoh tyngeh pyrshah ia u nongialam ka Aam Aadmi Party’s (AAP) u Arvind Kejriwal ha kaba iadei bad ki jingiakhih pyrshah CAA ha Delhi, u Myntri Rangbah (CM) ka Assam u Himanta Biswa Sarma hynnin ka sngi U Blei ula ong ba u Kejriwal u dei ban sngewthuh ba ka India kan ym lah satia ban long ka ri khlem ki Hindu.
U Sarma uba la iashim bynta ha ka rally paidbah kaba la long ha ka nongbah jong ka ri hynnin ka sngi U Blei ban ialap na ka bynta ka ilekshon municipal ka ban wan ula kyntu ruh ia u Kejriwal ba u dei ban pan mab halor katei ka jingiakhih.
“U Arvind Kejriwal u dei ban sngewthuh ba ka India kan ym long satia ka ri khlem ka jingdon jong ki Hindu bad ba baroh ki Hindu ki don ia ka hok ban wan sha India.U Kejriwal u dei ban pan mab na ki paid Hindu halor ki jingiakhih paidbah kiba la jia ha ka por jong ka jingiakhih pyrshah CAA,” pynpaw u Sarma lyngba ka twitter.
Na ka liang u Sarma ula kynthoh ruh ha kaba iadei bad ka jingshah pyniap jong ka Mehrauli kaba dei ka mat kaba la poi sha ka jingiatai kaba jur lyngba ki lad pathai khubor naduh kine ki khyndiat taiew ba la lah, da kaba ong nalor ka jingdonkam ban tehlakam ia ka ain iakhlad san shyiang jong ki muslim (triple talaq law) donkam ruh la ka jong ka ain na ka bynta tehlakam ia ka ”Love Jihad” lane ka mat ia kaba ki riew sain hima bad ki nongialam niam Hindu kila kynnoh ba ka dei ka jingkhroh da ki shynrang Muslim ban iathoh shongkurim bad ki kynthei Hindu bad pynkylla niam ia ki.
“Namar ka ri kala don ia ka ain ka ban tehlakam ha kaba iadei bad ka ‘triple talaq’ ngi donkam ruh ia ka ain pyrshah ia ka ‘Love Jihad’ bad ruh na ka bynta ka jingpyntreikam tang kawei ka ain,” ong shuh shuh u Sarma.
Da kaba kynthoh ia pyrshah ia u Kejriwal bad ia u Myntri ka tnat pule puthi ka Delhi u Manish Sisodia kum ki riew pyrshah Hindu bad ki nongialam kiba bamsap, u CM ka Assam ula kyntu ia ki paidbah ba kin iehnoh shisyndon ia ki.
Shuh shuh kham hadien haba phai biang halor ka mat kaba iadei bad ka jingshah pyniap jong ka Mehrauli, u Sarma ula ong, “Ka Love Jihad kaba ngi ia pule lyngba ki kotkhubor mynta kila wan tied jingkhang ha ki sorbah ki jong ngi.”
Ia u Sarma la synran lang da u MP ka Delhi u Manoj Tiwari lem bad kiwei pat ki nongialam ka party ha ka por jong ka jingiaid paidbah ha ki bynta jong ka Ghonda ha ka nongbah Delhi.
