Shillong, Nailur 26: U Nongialam ba rangbah ka Rashtriya Swayamsevak Sangh (RSS) u Dr. Mohan Bhagwat u la ong ba ka India kam dei satia ka ri kaba don ia ka rukom im jong ki ri sepngi hynrei ka dei ka ri kaba don la ka kolshor naduh ka por ki mynbarim bajah.
U ong ruh ba ka India ka dei ka ri kaba la hikai ia ka pyrthei shaphang ka longbriew manbriew.
“Ka civilization jong ngi ka don ka bor ban pyntylli lang ia bun kiwei pat ki civilization . Dei kata hi ba ka India ka lah ban kylla long ka Ri kaba don bun ki jait ktien, ka rukom riam, ka niam, ka jait. Kumta haba ngi kren shaphang ka Hindutva, ngim kren tang shaphang ia ka bynta jong ngi, baroh ki nongshong shnong ka ri ki dei ki Hindu. Ka HIndutva kadei shaphang ka lynti ka jingim, ka kolshor hynrei don pat ki briew kiba pyrshang ban ialam bakla ia ka Rashtriya Swayamsevak Sangh na bynta ka jingmyntoi shimet jong ki,” u la ong.
U ong ruh ba ha ka jingshisha ka jingriewspah jong ka India ha ka kolshor ka la don naduh ka juk Vedic. “Ngi la ngeit naduh kaba sdang ba ka kolshor jong ngi ban burom ia kiwei pat kadei ka tynrai ban pdiang ia kiwei pat ki kynhun jingngeit da kaba pdiang ia ka rukom mane blei jongngi,” bynrap biang u Bhagwat ha ka jingwan jong u sha Shillong hynnin ka sngi U Blei haba kren ha ka Vishisht Nagrik Sammelan ba la pynlong da ka Rashtriya Swayamsevak Sangh, Meghalaya Province.
U ong ruh haba don kiba kren shaphang ka jingkiew ka India, ki kren ruh shaphang ka jingkiew jong baroh kiba don ha ka. “Kam don satia ka mynsiem ibein para briew ha ka jingmut jingpyrkhat jong ngi haba iadei bad ki kynhun bapher bapher. Kadei tang kane ka ri ha ka pyrthei kaba lah ban pynneh ia ka tynrai da kaba wallam bad pyntylli lang ia baroh ki kolshor,” u ong.
Shuh shuh u ong ruh ba jingsngewthuh bakla ka la phriang kylleng ha ki paidbah haba iadei bad ka Sangh bad shah pynjahburom katba ia ka jingshisha pat lah ban tip hadien ba la poi sha ki shnat treikam jong ka.
U ong ruh ba dei lyngba kitei ki prokram ba ki pynlong lah ban sngewthuh shaphang ka Sangh khnang ba ki jingsngewthuh bakla jong ki paidbah yn lah ban weng noh.
