Plie u Conrad ia ka jingtei ba kamra ba 50 jingthiah ka Hispotal MCH ha Tura
Shillong, Nailur 21 : U Myntri Rangbah ka Jylla Conrad K Sangma ula ong ba ka kam ba iadei bad ka koit ka khiah lem bad ka pule dangle ki dei ki sobjek ba kyllain bha, ha kaba ka jingkynshew ka shimpor haduh 5-10 snem ban pyni ia u soh.
U Conrad ula kren ia kane ha ka jingplie ia ka kamra ba dang shna thymmai ba 50 jingthiah jong ka District Maternity and Child Hospital (DMCH), Tura bad jingpynlait ia ka Mother and Child Care Kits na ka bynta ki Kmie bad ki Khunlung.
“Ka roi ka par kam dei eh tang halor ka jingpynlut ia ka pisa hynrei ban pynthikna ba ki jingpynlut kin ai ia ki jingmih kiba lah ban thew. Ka koit ka khiah bad ka pule dangle ka dei ka sobjek ba kyllain bha. Ka jingkynshew ha kine ki kam ka ju shimpor san haduh shiphew snem ban iohi ia u soh” ong u Conrad.
Ula iathuh ba naduh u 2018, ka Sorkar kala buh hakhmat eh sha ka kam shakri ia ka imlang sahlang, naduh ka koit ka khiah, ka pule dangle bad ka bhah ka miat ka imlang sahlang kaba kot ia shibynta na ka saw bynta jong ka mangtyngka ka Jylla. Tang ka pule puthi marwei, u ong,kala ioh ia ka mang tyngka ba kot T.3000-T.3500 klur shisnem.
Haba ai khublei ia ka tnad ka Koit ka Khiah, u Conrad ula ong ba ka jingiada ia ka jingim ka dei ka jingkitkhlieh lang jong baroh.
U Conrad ula ong ba ka Meghalaya kala iohi ia ka jinghiar kaba bun eh ha ka jingiap ki Kmie ba kha khun hapoh ka Ri, kaba kot haduh 55% ka jinghiar. Hynrei, ula ban jur ba ka thong kaba khatduh hi ka dei ban long nod ka jingiap ki Kmie bad ki Khunlung.
“Ka jingsumar kam dei eh tang halor ka jingthoh ia ki dawai hynrei ka dei eh kumno ban iada ia ki jingim” ula ong haba kyntu ia ki doktor ba kin don ia ka mynsiem ban shakri wat hapdeng ki jingeh kiba bun.
U Myntri Rangbah ula pynpaw ruh ba ka Mother & Child Health Model ka Jylla kala ioh ia ka jingithuh hapoh ka ri bad pyntip ba ula shah khot ban ai ka jingbatai ia kane ka rukom treikam hakhmat u Myntri Rangbah Duh ka ri, kaba long ka khyllipmat kaba sngew sarong ia ka Jylla.
Ula bynrap ba ki dang don bun ki project ka koit ka khiah kiba dang pynkhreh mynta hapoh ka PM-DevINE scheme nalor ka jingthmu ban nang pynheh ia ka Mother & Child Hospital.
Kiwei pat kiba la ai jingkren ki kynthup ia u Sampath Kumar, Dr. P. Chyne, Director of Health Services (MCH & FW), kiba la pynpaw ia ka jingsngewnguh ia u Myntri Rangbah namar ka jingkyrshan ba khlem sangeh bad ka jingkut jingmut ban nang pynkhlain ia ka jingshakri ha ka koit ka khiah ha Meghalaya.
