Shillong, Iaiong 10: U Myntri ka Sorkar Pdeng ba khmih ia ka Food Processing Industries Chirag Paswan ha ka sngi Thohdieng, ula banjur ia ka jinglong kongsan ka Food Processing ha kaban pynduna ia ka jingduhnong bad ban kyntiew ia ka kyrdan jong ki marrep kiba pynmih.
Haba kren ha ka jingialang jong ka Parliamentary Consultative Committee hadien pat bad ka NIFTEM Council Meeting kaba la long ha Courtyard by Marriott, Shillong, u Paswan ula pynpaw ia ka jingdonkam ban shimkhia ia ki jingeh kiba la don lypa kynthup ia ka jingbym biang ia ki jingtei, ka lad ban ioh jingiarap pisa bad ki jingeh ha kaba iadei bad ki kor teknoloji.
U Myntri ula banjur ruh ia ka jingkongsan ban don ia ka jingiatreilang hapdeng ki tnad sorkar bapher bapher ban pynsuk ia ka jingleh ia ki kam khaii pateng bad iaroh ia ki sienjam kiba la shim da ka sorkar ha ka jingpynbeit ryntih ia ka GST, ka jingpynbeit ryntih ia ki jingpyrkhing ha kaba iadei bad ka jingshngain jong ki marbam mardih bad ka jingpyntreikam ia ki jingpyrshang da ki tnad bapher bapher.
Ha kane ka jingialang la wan ban iashimbynta da ki heh ophisar na ka Ministry kiba kynthup ia u Avinash Joshi, Secretary ka MoFPI bad u Devesh Deval u Joint Secretary ka MoFPI ryngkat bad ki Members of Parliament (MP) bad kiwei kiwei kiba donbynta lang ha ka kam.
Ha ka jingialang jongka Parliamentary Consultative Committee, la khmih bniah ia ka bynta jongka Food Processing kaba kynthup ia ki sienjam kiba la shim da ka Ministry ban wanrah ia ki polisi treikam bad ia ki jingkylla.
La ioh ruh ia ki jingbatai kiba bniah halor ki kam kiba la pyntrei kiba la wanrah ia ki jingkylla bad ki jingtyrwa jongka MoFPI bad hadien kane la ioh ia ka jingiakren bad ia ki jingai jingmut na ki dkhot jong ka Committee ban pynkhlain ia kane ka bynta bad ban kyntiew ia ka jingpyniar bad ia ki jingkylla.
Ka NIFTEM Council kala iatai sani halor ki jaka treikam kiba kongsan bad ki polisi kiba iadei bad ka jingai jinghikai, jingwad bniah bad ka jingpynkhlain ia ka sawdong sawkun jongka Food Processing ha ka ri baroh kawei.
Ki dkhot kila iatai ruh halor ki lad ki lynti kiban pyniasoh ia ki jingpynwandur bad ki jingdonkam jong ki karkhana bad ka jingiai mih ki lad bad ki kabu ha kane ka bynta.
